السبت، 6 أكتوبر، 2012

تعتقد انك كفو احترام ؟!!

في شيء مستغرب منه ... بخصوص تعامل المجتمع مع بعضه



ساعات احس انه احنا في حرب اكثر من انها علاقات اجتماعيه او عمل او زمالة


اذا قلت له زحمه قالك لا تخلي احد يعدي جدامك .. اذا احترمتهم ما راح توصل لبيتك

يعني امشي بمدرعه مثلا و معاي كلاشنكوف.... ابن ابوه يطق لي هرن ..

صح انه هالشي موجود بس لانه اصبحنا كلنا نتنيحس على بعض .. تحس اذا خليته يعديك خلاص جرح كرامتك

واخرتها دعمة و فجأه يتحول الشارع الى مسرح لتسليه السائقين .. وكل واحد يطق هرررن و اول ما يوصل لمكان الحادث

تحس صابته غيبوبه و هو متنح يطالع الحادث فجأه يوقف عنده الزمن

ليش ننقد على الشيء و احنا اول من يسويه ... و نطلب عدم احترام الاخرين و نقيم المأتم لانهم لم يحترموننا

العامل لا تعطيه وجة ترى يسرقك و لا يخلص شغلك

مديرك لا تعطيه شغل من قلب ترى يغثك ويدبل جبدك

... قمة التناقض ...

انت شتبي بالضبط ؟!!!



المرأه لا توافقها بكل شي حتى لو انت اللي تبيه بالاساس

الرجل لا تخلينه مرتاح ترى بيسود عيشتك

و بعدين شنو المطلوب ؟!! تبونا نستخدم الساطور في البيوت بدال الكلمة الطيبه و الحوار

عفوا ... توني سمعت طلق نار عند جيرانا .. شكلها المره طبخت مجبوس لحم و هو خاطره في مربين

و المصيبه انه اللي يقولون هالكلام هم اكثر ناس ما ينفذونه

يعني بخصوص العامل مثلا .. تلاقيه كل كم شهر هديه للسواق .. و كل سنه يسوي له عيد ميلاد مع الكيكه و المعزب يغني بصوته الجميل

سنه حلوة يا راجو
.. عادي اصدق يصير هالشي ...

اذا كنا مؤمنين في هذا الكلام فهي مصيبه لانه بهذا الشكل احنا نقول انه المجتمع غير محترم ... يعني  بالنهاية انت غير محترم لانك احد افراده


و اذا كنا مو مؤمنين فيه بس نظام ببغاء عشان نكون نفس باقي البشر هم هاذي مصيبه


كم اتمنى انه نكون مسلمين بالفعل مو كلام

نقول احاديث كثيرة و ننفذ عكسها ... الدين معاملة متى ما تطبق هذا المبدأ

راح نشوف مجتمع جميل جدا ... افضل حتى من المدينه الفاضله لانه بتكون المدينه المؤمنه


احترم الناس بالاساس و اللي مو محترم هنيه التصرف معاه اخر

بس مو يكون عدم احترام البشر هو الاساس و الاحترام لقلة ترضى عنها النفس من بعد زمن