بعنا الضمير ؟!!

هذه حال الدنيا ؟!!

هل بعنا الضمير ؟!!!

اخذت اتجول في اليوتيوب وعندما سمعت هذه الكلمات احسست

انها لمست ما في داخلي

فما هو جوابنا

هل بعنا الضمير ؟

شر قليل من اجل الخير كثير

هل قليل من الشر واجب من اجل كثير من الخير ؟؟؟

.

.

مقوله سمعتها في فيلم kindom of haven و عندما فكرت فيها وجدت انها مطبقه بشكل كبير في حياتنا

.

.

فهل هو فعل صحيح ؟؟ وماهي حدودها ؟؟

.

ام هذه مجرد شماعه نعلق عليها فشلنا في امور معينه او اختيارنا الطريق السهل والطرق الملتويه لانجاز اهدافنا

.

لو نلاحظ في الحكم تستخدم بشكل كبير بما يسمى مساومات سياسيه اغض الطرف عن مناقصه مقابل موقف معين

.

او عن فساد اشخاص من اجل استجواب او تمرير قانون او مشروع

.

وحتى في المجلس مطبقه بصيغه اوقف معاي .. اوقف معاك مو مهم على خير او على شر

.

يعني هل مسموح لي بقليل من الشر من اجل الخير الكثير ؟؟؟

.

.

وبأي حد يسمح لي هذا المبدأ ؟

.

لان فيه ناس ماشاء الله عليهم استغلوا هذا المبدأ و ما صرنا نشوف منهم إلا كل شر و الخير اللي يبون يوصلون له

للحين ما بين منهم

.

اعتقد انه مبدأ خاطئ حتى لو كان يطبق بشكل فعال في المجتمع

.

مبدأ مطاطي لا حدود له

.

لان في النهايه بنوصل لمرحله بيطغي فيها الشر اللي راح نسويه على الخير المستهدف

.

لان اللي اساسه شر لا نهايه له سوى الشر

.

.

.

اللهم احفظ الكويت و اهلها من كل شر

اللهم احفظنا

مهزله بحق الكويت

ظاهره للاسف بدات تنتشر في جرايد الكويت بشكل كبير

المشكله مو في سالفه انه يطلب الفلوس ( الشحاذه ) لانه يمكن صج محتاج وان كنت استغرب من توفر المال من اجل الاعلانات

لكن الله العالم باحوال البشر

بس من باب اولى انه يطلب من شيوخه , من ديرته , من حكومته

صحيح الخليج كله اخوان وشيوخه يستاهلون كل خير و فيهم الكرم والنعم فيهم

بس مهما كان هذه عيبه بحق الكويت حكومه و شعب

ترى معناها كبير

ليش ماعندنا شيوخ ؟!!!!

مافي حكومه ؟؟

هذه يضرب في هيبه الشيوخ و الاسره الحاكمه بعد ما تم ضرب الحكومه

وبالتالي ضرب اكبر في هيبتنا كدوله

انا اعتبر هذه الاعلانات اهانه للكويت

لو كانت لاحد كبار الاسره تهون

لو كانت لوزير تمشي

نائب نبلعها

على الاقل كويتي منا و فينا و(( يعتبر )) من رجالات الدوله

اتمنى للاسره الحاكمه ان تنتبه على هيبتها ترا صج كفايه

كفايه مهازل بحق الكويت

اللهم احفظ الكويت واهلها من كل شر

الطائفيه و العنصريه

الطائفيه و العنصريه انتشرت للاسف بالمجتمع بشكل قبيح جدا

للاسف صار الواحد يعامل اللي قدامه مو على اخلاقه و طريقه تعامله معاه

لا هاذي موضه قديمه خلاص

اللحين انت وين ساكن ؟ ولد منو ؟ ما هو مذهبك ؟ توجهك السياسي لو سمحت ؟؟ و لو ما فيها كلافه عليك مره وحده
النادي اللي تشجعه

يمكن بعد هذا ما يكون على هواي

زين انت شكوووو و هذا كله شكو

اللي اعرفه و ربوني اهلي عليه اني اعامل الناس لاحترامي لنفسي بالمرتبه الاولى و من ثم طريقه تعامله معاي

يعني شنو الفايده من ولد عمي ولا ولد طائفتي ولا ولد منطقتي لا ويشجع ناديي و اخر شي ما يسوى بيزه

الاساس في التعامل شنو ؟؟

شخصيه اللي امامك ولا السيرة الذاتيه

يا ناس اعقلوا فكروا لا تصيرون مسيرين ناس تمشيكم على كيفهم

ترى المدافع الاكبر عن الطائفه و القبلي ابن القبيله و ولد بطنها و الوطني و باقي التصنيفات اللي نازله السوق

ترا ما همه انت ولا اهلك

المهم الكرسي الحلو و النفوذ الطيب

لان في ناس غبيه صج اسلوبها بالحياه بان تجعل الكل يكره الكل و يحبني انا

وبالتالي يكون هو المحبوب و الناس كلها كخه مو حلوين يع

بابا اكبر شوي

بس الشرهه مو عليك على اللي يتبعك من هالمدمغين ما يدرون وين الله حاطهم

ترا شي يبط الجبد صج

يعني طبيب كويتي الكل يشهد له ما يترقى لانه مو من نفس الطائفه

ولا ضابط قدير يفيد البلد بس مو من قبيلتنا

او مهندس بس مو من عيالنا

للاسف البلد تخسر الكفاءات بسبب هذا التعنصر

(( لكم دينكم و لي دين ))

اقروا هذه الايه عدل

وانتم كل واحد مو من مذهبك خلاص اسوء خلق الله

يبه .. الله اللي بيحاسبه على عقيدته ولا انت

اللي اعرفه الله بيحاسب كل واحد على ما يؤمن به و يعمل به

مو يحاسب على ما يعمل به الاخرون

انت لك تنصحه و بس

سمع كلامك كيفه هو اللي اختار وخلاص

بس غصب يا انا صح يا انت عدو

دام اللي قدامي ما يتعرض لــعقيدتي ولا يجرح فيني

ما اعتقد في سبب يخليني اكرهه لهذه الدرجه

(( ان اكرمكم عند الله اتقاكم ))

يعني ترا ما فرقت انت ولد منو ولا وين ساكن ولا توجهك السياسي

يعني ما يحتاج الكره الاعمى هذا

والمشكله انه اغلب اللي يكرهون و يقولون الفلانيين فيهم و فيهم

تللاقيه عمره ما عاشرهم ولا يعرف عن طبايعهم شي

زين على اي اساس تقول هالكلام

(( اقربكم مني يوم القيامه احسنكم خلاقا ))

لذلك اعملوا باخلاقكم

طبعا هنا انا اوجه كلامي للعقلاء او من بقي فيهم عقل

اما اللي يتبعون الخفافيش من غير لا تفكير ولا عقل هذولا ما فيهم طب خلاص

انا مالي شغل شنو تفكيرك وايمانك فهذا قرارك و انت اللي سوف تحاسب عليه

سواء في الدنيا ام الاخره

ولكن اللي انا اطالب فيه واتمناه انى نعيش باخوه مثل قبل و اهلنا اول

لا فرق بينا بسبب اصل او مذهب

الفرق الاساسي هو بالعمل و الكفاءه حتى نرقى بالوطن

ويرقى بنا الوطن

اذا اخطأت بشيء اتمنى تنوروني و تبينوني لي خطئي

وان كانت رؤيتي صحيحه اتمنى منكم ان تساندوني

لان نكون بدل الاغلبيه الصامته

إلى الاغلبيه الفعاله التي تحمي بلدنا

اللهم احفظ الكويت و اهلها من كل شر و سائر بلاد المسلمين

اسقاط القروض

اصبحت قضية القروض في الكويت

قضية من لا قضية له

الكثير من النواب اشبعوا فيها لطم

وطبعا تأليفات الحلول يا سلام الله ما كثر منها

لكن الملاحظ فيها انها مجرد استزاف للاموال العامه

وضحك على الذقون لاني ابصم بالعشره انه نص النواب

اذا مو كلهم عارفين انها قضيه خسرانه ولكن لزوم الشغل يا باشا

وطبعا صاحب السمو امير البلاد انهى هذا النقاش بكلمته انه لا اسقاط للقروض

بس لا تخاف على نوابنا يلفونها لك لف

قايلكم انا الكرسي حلو ما صدقتوني عشانه ممكن يحطون اقتراح بقانون ان الحكومه تشتري لكل مواطن جزيره ويخت و تعين له طاقم كامل لخدمته

لا والنائب نفسه اول من يرفض الاقتراح هذا بعد

يقول لك الاقتراحات ببلاش عشان اخر شي يقول لك انا اقترحت الف اقتراح بقانون

ولو تشوفهم نصهم نبي مطبه ولا دوار والسوالف هذي

المهم نرجع المحور حديثنا على قوله الصيرفي

طبعا شفنا المقترحات الفلته من " بعض " النواب طبعا

واللي برايي فاشله بأمتياز

نشوف صندوق المعسرين الانجاز الاعظم في الالفيه الثانيه لحكومه دوله الكويت الموقره

خلكم من سالفه انه ما راح يقترض بعدها لمده 25 سنه والسوالف هذه بس عادي نمشيها

بس انا مو قاهرني إلا بند واحد في القانون

البند اللي يمنع المستفيد من الصندوق عن التقاضي ورفع اي قضيه على البنك المتعامل معه

بذمتكم هذا شنو معناه ؟!!!!!

محد يعرف؟!!!

اوكي تعال يا كومار

شنو معنى هذا البند ؟

امممم

يقولكم كومار طبعا مو انا لاني اعوذ بالله انتقد الحكومه اعزها الله

يقول ان كأن اللي حاط القانون صاحب البنك مو الحكومه

وكأنه اعتراف ان البنوك غلطانه

وخدعت و سرقة المواطن

بحمايه من الحكومه

وغفله من البنك المركزي الكويتي او " تغافل "

يعني بالنهايه لا الحكومه عارفه شنو تسوي ولا بعض النواب

هذا يدور على مصلحه التجار

و هذا يدور على الكرسي

زين انا عندي اقتراح بسيط جدا جدا جدا

مو البنوك غلطانه ؟؟

زين مو البنوك خالفت قرارات البنك المركزي الكويتي ؟؟؟

خلاص

لقيناها

نشوف كل قضيه على حده

وكل قضيه نلاقي فيها مخالفات

نقول تعال يا البنك انت غلطان ولازم نأدبك

بس نفس الوقت احنا خايفين على الاقتصاد الكويتي

شوف كل قضيه انت مخالف فيها القوانين و اللوائح

سوف تحرم من اخذ الفوائد فيها ولك اصل الدين فقط

اعتقد بهذه الحركه

لا الحكومه دفعت فلس من الاموال العامه

ولا البنوك خسرت اصل الدين

ولا المواطن توهق

واعتبروا الفوائد هذه اللي تم الغائها غرامه على البنك

مع العلم باقي الدول تاخذ غرامه محترمه

بس احنا طيبين ومهما كان عيالنا

وبهذا الشكل تحل القضيه من اساسها وليس المشاكل المتفرعه منها

لان المشكله الاساسيه هي عدم التزام البنوك

وليس عدم مقدره المقترض على السداد

وجذيه ما ظلمنا احد

ولا شرايكم !!

طبعا هذا حلم لن يتحقق طول ما دام الاخوه الافاضل في الجهتين تفكيرهم

في التجارة و الكرسي ولم يفكروا في الكويت

اللهم احفظ الكويت و شعبها من كل شر