النظرة الإيمانيه

من اجمل ما في الحياه هي النظر لها بصوره جميله
( مثل ما قالت اختي في دار عزيزه بموضوعها الاخير )
( كن جميلا ترى الدنيا جميله )

ولكن الاجمل هو النظر للامور بنظره إيمانيه

سواء في امر صغيره ام كبيره
صحيح انا مو شيخ دين ولاني جاي اتكلم عن الموضوع دينيا
كثر ما اتكلم فيه كفلسفة للحياه وحكمته الرائعه
واثره علي

مثلا كان الوالد_الله يحفظه لنا_ دايم يدعوا دعوه جميله جدا
اللهم ارزقنا من حيث لا نحتسب

ذاك اليوم رحت لمكتب بشحن سيارتي لمصر المحروسه
قال الشحن ب200 و تعال بعد العيد ماعندنا شحن اللحين

قلت اوكي اخلص الدفتر في نادي السيارات واجيه بعدين

ومريت الوالد وقال دعوته الحلوه ثاني يوم رحت اسوي الدفتر
ولا اشوف مكتب للشحن قلت اسأله شنو وراي
ولا الحمد الله يقول لي 160 وخلال يومين في طلعه لمصر
قلت ممتاز اتفقنا

و انا راد البيت قاعد افكر قلت هذه جد دعوه الوالد ما شاء الله
الحلو مو بس اني وفرت وقت و فلوس لا
الحلو اني في هذه اللحظه

جاني صفاء نفسي صرت اكثر ايقان ان الله اقرب من ما احنا متوقعين
وان كل شي يجي خير ان شاء الله
لذلك ماصرت اشيل هموم بشكل كبير و أحاتي
لأ اسوي اللي علي والباقي على الله

احنا لو ننظر للامور بهذا الشكل بنرتاح بشكل كبير جدا
تعرفون انا طبقتها وافادتني بشكل كبير في وقت كان صعب جدا علي
لكن الله سبحانه وتعالى سهله حيل علي وعلى اهلي

انا تعرضت قبل كم سنه لحادث سياره الله لا يعوده علي
ولا يوريكم اياه ولا من يعز عليكم

وقت الحادث انا رحت في غيبوبه كم ساعه
لما صحيت اشوف الدنيا بيضا
والناس لابسه ابيض
_ دخلت جو افلام امريكيه :) _
ولا انا في المستشفى
طبعا وقتها انا قمة الفصلان
اسال الدكتور اقوله انا وين
يقول انت في المستشفى
اقوله ليش
يقول سويت حادث
طبعا مو فاهم شنو يعني مستشفى ولا شنو يعني حادث وقتها
يمكن سألة 10 مرات يالله استوعبت

تعرفون اول كلمه قلتها بعد ما استوعبت و اول شي سويته
اللي خلا الدكاتره تستغرب مني



ابتسمت :) وقلت الحمد الله

لا تشوفون شنو سوت فيني هالكلمه ارتحت راحه مو طبيعيه
طبعا انا متكسر و متشلخ ومتروس لفافات
بس وقتها ولله الحمد شغال ضحك وسوالف مع الطاقم الطبي كله
تقول غرفتي دوانيه للجناح مو غرفه مريض

كلمه خلت اكثر من شهر في المستشفى و كم شهر برا يالله قدرت امشي على رجولي
يمرون علي مثل الحلم

في وقت كان واحد اعرفه اصابته اقل من اصابتي بكثييير
وقعد في المستشفى في وقت اقصر مني بكثير
قال كلمه وحده لي عن فترته هذه
قال من اسوء فترات حياتي
الساعه عدت علي سنه
كنت اتخانق مع اهلي
مالي خلق نفسي

كلمه وحده فرقت بينا
بس فرق كبييييير في الاثر اللي صار

_ طبعا قولوا ما شاء الله لاني مو ناقص عين وحادث ثاني انتم تعرفون عيون "بعض" اهل ديرتنا الحبيبه _

وكانت لي نظره ايمانيه فيه بعد
بكلمه ان شاء الله خيره

كان صج خير لي لما قمت افكر فيه
وقتها انا كنت محتاج بشكل كبير اوقف دراسه كورس لاني موقادر نفسيا للضغوط اللي كنت فيها
بس كنت خايف من كلمه رجع الكويت فاشل
وسوالف الناس اللي مالها داعي

عاد ربعنا جاهزين للسوالف هاذي
فكان لي الحادث خيره ريحني من الدراسه كورس سويت فيه احلا رفريش

وقبل دراستي كنا متعودين العايله تروح العمره كل سنه
ومن اول ما سافرت ادرس وانا ما رحت وكنت حدي متشفق للكعبه الله يشرفها
وسبحان الله في هذه الفتره انا كنت مخطط لعمره وحده
والله رزقني ب3

وانا خلال 3 سنوات ما كنت اقعد عند الاهل إلا كم اسبوع في السنه
وفي ذاك الوقت قعدت مع اهلي
وقضيت احلا وقت معاهم

واحسن شي كان في الحادث

انه خلاني اعيد جميييييييييييع حساباتي

سألت نفسي
على اعمالك وين كنت بتروح ؟!

الجنه ولا النار

خلاني اسأل نفسي
زعلك على فلان يستاهل ؟!!
ولا زعلت فلان منك على شي يستاهل ؟!!

احنا لو نقف وقفه ايمانيه ننظر فيها للي حولنا
لاحوالنا بتكون دفعه كبيره جدا لنا في حياتنا
وبتكون حياه بهموم اقل
بأمال اكبر
بأهداف اعظم

لو كلمتي وصلت لقلب انسان واحد واستفاد منها
بشعر بالرضى والسعاده الكبيره لاني قدرت افيد احد
مثل ما ناس كثيره فادوني

اللهم احفظنا من كل شر

نتضامن من اجل الكويت

رسالتنا سامية ...
رسالة الى حكومة الكويت وأجهزتها الامنية , كفُوا ايدكم عن التدوين , فنحن سنمارس حريتنا في التعبير والرأي وفق المواد الدستورية والأطر القانونية والمسؤولية الأخلاقية والحدود الأدبية التي تحتمها علينا تربيتنا وحبنا للوطن ولن نخشى الوعيد ولن نرضخ للترهيب ، ونعلن تضامننا مع الزملاء الذين مسهم التهديد'

الاستخبارت الذكيه ام الغبيه

اللي خلاني اكتب هذا الموضوع هو اتصال هاتفي

كان فيه صديقي العزيز في قمة الخوف من الحكومه والاستخبارات

وبص يا باشا الحكومه بتسمع كل حاجه خد بالك على نفسك

قلت ياااا سلاااام لهذه الدرجه انا مهم حاطين لي موظف خصوصي يسمع مكالمتي

صج الحكومه ما تقصر

طبعا انهيت المكالمه و صديقي زعلان لاني قلت الكلمات المحظوره

وقلت انه واخوه قاعدين يجهزون تفجير وانا معاهم

والرجال صدق ان الموظف الخاص بتنصت علي ركض على المسئول

يقول له الللللللحق فيلسوف ينسق مع مجموعته الارهابيه

بتفجير برجر كنج بنيدر

ههههههههه شر البليه ما يضحك

يا ناس صج احنا عندنا استخبارات في دولنا العربيه

واقدر اقول انهم يستطيعون سماع مكالماتي

و يعرفون اكثر مطعم اتصل عليه و وجبتي المفضله

بس تراهم مو بهذا الغباء اللي ينطروني اقول تفجير

يركضوووووون على باب بيتي

يقولون لي
صاااااااااااادوه

اسم جهاز الاستخبارت
Intelligence Agency

يعني الوكاله الذكيه يمكن هذه الترجمه الحرفيه

وركز على ذكيه _مو زكيييه هذيك شغالة حموود غير_

يعني فيه شي اسمه تحريات

في شي اسمه معلومات عندهم

مو كل من قال كلمه ضد الحكومه خلاص صار بن لادن

تراهم والله دواهي واذكياء ولا ما تلقى الانظمه العربيه على كثر بلاويها ماسكه صح

لا يبه هدوو اللعب شوي

تراني انصح الاستخبارات الامريكيه تاخذ دورات في العالم العربي

والله تتعلم
واكبر دليل لما كانت تعجز من المشتبه فيهم ما تعرف تسحب الكلام منهم

تجيبه عندنا
ما يطول إلا وعندنا المعلومات عن كل شي

تذكرت سالفه واحد

يقولك ايام الثمانينات
كان من المشاركين في دوانيات الاثنين من المعارضه

وله مقالات كثيره ضد الحكومه
وذاك اليوم يتصلون عليه امن الدوله و يستدعونه
لما وصل لهم

قالوا له يا ابو فلان
شفت الملف هذا
_ طبعا كان ملف عوود _
هذا ملفك

ناوي تتعدل ولا شلون

رد عليه رد عجبني والله
قال شوف
هي وحده من الاثنين
بما انه قعد كل هالفتره لين صار هالكبر

يا انه ما فيه شي يستاهل وانت ما عندك سالفه

او انه كله بلاوي وانتم ما فيكم خير مخلني طول هالفتره

طبعا انحرج ضابطنا الحبيب وصاحبنا طلع بيتهم

يعني حتى لو اجهزة الاستخبارات سوت لي ملفات من 7 طوابق
مو مهم طول ما انا ما هددت البلد بشكل فعلي

لانه في ناس كثيره مسكتهم الدوله ولله الحمد
وكانوا مخططين لبلاوي بالخش و الدس

مو كل من قال تفجير تراه ارهابي
و مو كل من سكت و ما قال هالكلمه تراه بريء

والله على كلمة ارهابي تذكرت اللي مسكوه بالمغرب
يا حليله سالفته سالفة هذه

ناوين يحطونه كبش فداء لامريكا
يعني شوفونا ترانا مضبطينكم جايبين لكم ارهابي

لما قابل الامريكان على طول الولد قال

واللللللللللله مو ارهابي والللللله
اصلأ انا ما اصلي
واشرب خمر

يحليله مسكين صار شرب الخمر شهادة برائته
عاد انتوا مو تصدقون الخبر و تقطعون الصلاه
خايفين من التهم

واقول حق صاحبي المسكين اللي بيمشي جمب الحيط
انبسط يا عم تراهم ما دروا عنك

واذا جاني الضابط بطلعك من السالفه
وابلغ على بنت الشاميه و دار عزيزه وحسافتج يا كويت
اقول هم اللي مخططين معاي على عمليه تفجير
(( الهم اللي فينا والاحباط ))
وكتابة بعض منه في المدونات

اللهم احفظنا من الاستخبارات العربيه منها و الاجنبيه

هم الحوثيين فمن نحن ؟!!!!!

سؤال تمت الاجابه عليه بسبب عمليه تطهير الحدود السعوديه من هذه الفئه الضاله

نحن اخوه متقاربين نرتص كالبنيان الواحد

الجدار الذي يحمينا من الاعداء

نحن الدرع والسلاح لبعضنا

اول الدروس الرائعه التي استخلصتها من هذه العمليه

هي قوه المواطنه الخليجيه و السعوديه

فحتى في الوقت الذي كانوا الاخوه الخليجيين مختلفين على بعض الامور البسيطه

اشد الاختلاف لكنهم اول ما حصل هذا الانتهاك

كانوا من اول الواقفين بجانب اخوانهم بالمملكه العربيه السعوديه

ولم يقف الامر عند ذلك الحد

فالقوات المسلحه الكويتيه وضعت تحت خدمه القياده السعوديه

كما اكد صاحب السمو الامير صباح الاحمد

برسالة للملك عبد الله بن عبد العزيز

استعداد القوات المسلحة الكويتيـة أتم الإستـعداد لمشاركة قوات المملكــة العربيــة السعوديــة الشـقيقــة في حمايــة أراضيها و محاربة المعتدين الحوثيين

وكما أعلن وزير الخارجية الإماراتي عبدالله بن زايد آل نهيان "تأييد دولة الامارات العربية المتحدة ووقوفها الى جانب المملكة العربية السعودية في الدفاع عن أراضيها وتأمين حدودها من أية اعتداءات تتعرض لها وذلك من منطلق الروابط الاخوية والمصير الواحد الذي يربط البلدين"

هذا امثله من ما جاء من مختلف القيادات و الشعوب الخليجيه

هذا الذي يجعل ايماني و املي في الوحده الخليجيه يزداد

فأن كانوا هم حوثيين

فنحن خليجيين

هذا احد الدروس المستفاده من عمليه التطهير

والدرس الثاني وهو درس مهم جدا لنا في الخليج

هو ان الشعب وقف بالكامل مع القياده

سنه و شيعه فلم ينحدر إلى مستوى اللعبة الدنيئه الذين ارادوا بها الدمى من الحوثيين

ومن يحركهم ويلعب بهم بأن يفرقوا بين الاخوه في الوطن الواحد

الشيعي و السني

لاغراضهم السياسيه والاستراتيجيه الدنيئه

ولكن هيهات فلقد قال الشعب السعودي كلمته سنه و شيعه

وقال الشعب الخليجي بكامله كلمتهم

خلف قيادتهم الحكيمه

كلنا في صف واحد و جيش واحد مهما اختلف مذاهبنا وقبائلنا و طوائفنا

كلنا نقف وقفه الرجل الواحد في وجه اي اعتداء على خليجنا الحر


اللهم احفظ الخليج و اهله من كل شر