قصتي مع الساحر

انا و الساحر

في احد الليالي و انا مسافر لوحدي كنت اتمشى في شارع مشهور بالمدينه به الكثير من الباعة المتجولين و لاعب خفة يد او ما نحب ان نسميه بالساحر



في المرات اللي فاتت كنت اشوف هالساحر و اقول بداخلي يخرب بيته والله عليه خفت يد مو طبيعيه و كنت لازم اوقف اشوف عرضه و احاول اتصيد عليه الزلة و اكتشف سر خدعة البصريه اللي يمارسها علينا و اكون انا الفارس العبقري اللي اكتشف خدعته


امام الجمهور و يصفقون لي


لكن للاسف لم يوفقني الحظ بان اكتشفها


و في هذه الليله وقفت اشوفه كالمعتاد لكن هذه الليلة كان لها خصوصية غريبه

لانه تفكيري بدا يروح انه يتعامل مع الجن و انه ساحر صجي

لانه حركاته كثيره و عقلي الفذ ما اكتشفها خصوصا انها في الشارع مو مسرح معد خصيصا لهذه الخدع



في البداية كنت اقول لنفسي يا عمي هذا وينه و السحر الصجي وين هذا لو ساحر اصلا كان شكله جذية و قاعدلي يمصخر بنفسه عشان هالكم فلس بس



المهم اخذ قطعة نقديه من احد الحضور اللي باين انه مو من جنسيته اصلا ولا من اهل البلد


_ عشان محد يقول انه متفق مع الجمهور لاني قلتها قبلكم _



و قام رفع ايده امام بطنه تقريبا و خلا القطعة المعدنيه النقديه تطير ما بين اليدين وحده فوق و وحده تحت و القطعه تطير بينهم لااااا مو بس جذيه و هي تلف بعد


طبعا .. شنو اقول بهالوقت لنفسي ... قديييييمه اكيد فيه خيط شفاف


يخرب بيته كانه كان يسمعني و صار يحرك ايده و يقول شوفوا عشان تتاكدون انه مافي خيط


في هذه اللحظه سوا حركه صدمتني و خلتني اقول استريييييح


خلا القطعة تدور حوالي جسمه او بالاصح تطير حوالي جسمه



طبعا انا قي هاللحظه قمة الانصدام و تسمع الناس تقول واااااو و اللي منبله و اللي يبقق عيونه و انا واحد منهم



هنيه و فجاة مستوى الايمان عندي ارتفع حسيت نفسي العريفي ولا المذكور



قمت استغفرت ربي و اول ما قلت كلمة استغفر الله



طاحت القطعه منه



انا بهالوقت اقول بداخلي هييييييه صدته و قلت اكيد انها طاحت مني


انا الشيخ فهد بارك الله فيني و جعلني ذخرا لهذه الامه



لكن طلعت هذه الحركه من ضمن العرض :(

_حسافة عاد كنت ناوي افتح لي مركز رقيه شرعيه و اترزق الله_


باقي العرض انه يمسك مسدس لعبه و يسوي نفسه يرمي باتجاهها و بالتالي القطعة النقدية تطير و تطيح في القبعه اللي وضعها على جنب


كان حواليه الناس دائرة وسيعه تتابع عرضه


كان هو تقريبا على يساري من بعيد



او مثل ما احب وصفها كانه الدائرة ساعه و انا واقف عند الساعه السادسه و هو الساعه العاشرة


في هذا الوقت و مستوى الايمانيات عندي اكبر من تسونامي قمت بقرأت المعوذات



الساحر بدا يتغير لونه للاحمر و يعصفر وجه او يتعصر تقول واحد ماكل من كنتاكي و متسمم

 يحاول يسوي الخدعه مو قادر .. و انا طبعا ايمانياتي قاعد تزيد و اكمل قرأت المعوذات و هو يحاول بجهد انه ينفذ خدعته ولا هو قادر ابداااااا


طول و هو على هذه الحاله


ما في امل يا حبيب الشيخ فهد بزات نفسه بيئرا عليك


فجاة تحرك من مكانه



و وين اتجه ابو الشباب



اتجه صوبي ..


ياااااااا سلام انا هنيه حسيت اني توهقت معاه


بس قلت لاااا يا ولد مالك الا المعوذات ارهي عليه
_ لغير المتحدثين باللغة الفرنسيه ارهي يعني زيد _



جاي صوبي و وقف جدامي عطاني ذيج النظرة اللي خلتني اقول شكله استدعى ٨ عفاريت و شيطانين و ١٤ جني





و عطاني ظهره و حاول يكمل السحر كانه يقول لي اضبط حالك و خلني اكمل سحري لا العن شكلك بالجن



يا روح ما بعدك رووووح .. ابدا لن اسكت والله ما اامن له .. و المعوذات و ايه الكرسي ورا بعض مافي فجه ( فكه او مجال )


_ ملاحظين اني اترجم الكلمات للاخوة الايطاليين_


هنيه وقف الخدعه و قال خلاص ما راح اكملها ... و عطاني ذيك النظرة مرة ثانيه اللي كلها نار و شرار ... حسيت انه بيصكني ذاك الراشدي ( الكف ) المحترم


هنيه قلت يا ولد انت جاي سياحه شلك بالطلايب و السحره و الجن



و احلى واحد ما تشوف الا غبرته في الشارع مع انه الشارع مافي ولا حبة تراب


انا ناقص انسى الاذكار على يوم يقوم يقلبني ضفدع حول ليش يا ربي


ابعد عن الشر و غني له بالطبلة البلدي بعد



رحت تعشيت علي بالف عافيه و بعدها رحت الفندق .. و تسلطت علي الافكار الجميله بما اني بروحي و الهوا حب يمازحني و يضرب الشبابيك في بعض


قعدت اتفكر باللي صار .. انا شاللي قردني مع هالساحر



بس بالفعل مصدوم شلون اني كنت بالفعل امام ساحر صجي و معاه جن حقيقيين كانوا على مسافة متر مني ولا ادري عنهم


يا ويليييييي انا بخاف من الكلب يطلع لي اسد


و من يومها المعوذات ما تفارقني ... و قلت الحمد الله انه بالفعل كلماته كانت الدرع الحامي منهم


و هذا كان بعد تجربة حقيقية وليس مجرد كلام محاضره نسمعها كل كم يوم



لا تنسون المعوذات لا يجيكم هذاك الساحر و يقلبكم ضفادع




انا حذرتكم

انت وانتي سبب فخري

الحمد الله اللي خلقني مسلم كويتي خليجي

هاذي العباره مو عنصرية لكن من حقي ان افتخر بمن انتمي لهم لانهم بالفعل مدعاة للفخر

و افعالهم الاخيرة خير دليل على ذلك

فيه شباب اخوان بتويتر يقولون ان الشعب الكويتي راعي هبة حتى في الوقوف مع القضايا العامه

وانه مثل المدونات كقطع الدومينو ما ان تسقط الاولى حتى تلحقها الاخرى

لكني اراه بمنظور اخر و يمكن تجلى لي بالفترة الاخيرة بشكل اكبر

شعور المجتمع الكويتي بانه جزء لا يتجزء من الجسد الاسلامي اللي صوره بوقوفه مع اخوانه المسلمين في سوريا و الصومال بشكل خاص بالفترة الاخيرة
شعور لا يوصف من الفخر

تشوف الناس تتكلم بحرقة عن الظلم اللي يعانون منه اخوانهم بسوريا او ليبيا و تشعر بالامهم

حتى خرجوا باعتصامات و مظاهرات من اجلهم

و حتى اخواننا بالصومال نحزن لمجاعتهم

 و الكل ساهم بالحملة التي تريد انقاذهم و مازالوا يساهمون

حتى اخوي الصغير جاي ينظم حملة تبرعات عندنا بالعايلة

هذا شي مو هبة ولا مجرد حب ظهور يمكن يكونون قلة قليله جذيه
 لكن السواد الاعظم تشعر بصدقهم و انه اقصى ما يتمنون هو رفع الظلم عن اخوانهم

شعرت بالفخر لما قدر الشعب الكويتي يشكل ضغط على الحكومه

شعرت بالفخر لما سمعت بخبر طرد السفير

شعرت بفخر كبير و خنقتني العبرة عندما سمعت اخواني السوريين الاحرار الشجعان و هم يهتفون لشعب الكويت وهم في سوريا امتنان لما قام به 

 هذا الشيء جعلني اشعر انه ما نقوم به قد يساعدهم

اهتمام الشعب الكويتي بالقضايا العامه و شعورة بالمسئوليه شيء رائع

و الاحساس بانه قد يستطيع مساعدة اخوانه المسلمين في كل مكان
متجاوز بذلك حدود دولة الكويت

انه شيء جبار

لانه يضع الكويت في محورها المناسب

واننا لسنا باستقلاليه عن مشاكل المسلمين

قال رسول الله صلى الله عليه وسلم

(( مثل المسلمين في توادهم و تراحمهم كمثل الجسد الواحد اذا اشتكى منه عضو تداعى له سائر الجسد بالسهر والحمى ))

يا شعب الكويت الكريم

اني افخر بكم و بكل شريف يشعر ان له دور يؤديه من اجل رفع الظلم عن اخوانه في كل مكان

و في تطوير مجتمعة الكويتي و الاسلامي

الف شكر لكم لانكم جعلتموني اشعر بانه لنا تاثير

الحمد لله الذي خلقني مسلم كويتي

انها ليست عنصرية لكنه شعور جميل بانتمائي

بوابة المقبرة تختصر مجتمع

صورة ليست لبوابة المقبره

 

دائما اتذكر كلمة خالي المؤمن كٓيسٌ فَطِن مو كيس قطن

.. عشان جذيه تعودت اني اشوف الامور بنظرة ثانيه ممكن تفيدني بحياتي

 و مثل اليوم المقبرة لفتت نظري باشياء يمكن ما كنت انتبه لها

من بعد صلاة العصر رحت المقبرة ولا الناس توها طالعه من المسجد

و بتركب سياراتها تدخل المقبرة لمكان الدفن و الصلاة على الموتى _الله يغفر لهم و يرحمهم برحمته و يثبتهم عند السؤال_

ادارة المقبرة فتحت باب الدخول و الخروج لدخول المقبرة عشان يقللون الزحمه على خلق الله

الباب اللي عنده تتغير نفوس البشر

 و تغسل من امور كثيرة منها الانانيه و الغرور

 فتلاقي الناس متسامحه مع بعضها يعني لما تزدحم الطرق ما تسمع ولا هرن او كلكس مثل ما يسمونه اهل السعوديه الكل ينتظر دورة

الغريب في البوابه انها صنفت البشر

 فالناس عند البوابه كانوا موقفين سياراتهم على جانب الشارع و بعض الناس بيطلعون اول عشان يلحقون على صلاة الميت

في البوابه الثانيه كانوا يسمحون لبعض بالمرور من غير ما يزاحمون بعض و شغل النحاسه اللي يصير في شوارعنا

اللي من اول ما تعطي اشارة الا ابو الشباب دايس حده عشان يغطي عليك

_للامانه ساعات اكون منهم لما ازهق من ام الزحمة و من اللي يدخلون علي من حارة الامان _

البوابه الاولى محد كان يقدر يتحرك لا و بعضهم كان بالاخير يدخل على البوابة الثانيه لكن بنفس نظامها هي و يمشي بسلاسه 

الكل نيته صافيه ان شاء الله .. لكن النيه الصافيه بس مو كافي و هذا مثل مجتمعنا

اللي يحب الوطن كثير .. لكن اللي يعمل من اجله بنظام مثل ما صار بالبوابه الثانيه هم اللي يفيدونه

مشكلتنا مو بحب الشي ولا بنيتنا الصافيه المشكله تتلخص بالنظام و نتذكر حديث نبينا المصطفى محمد صلى الله عليه وسلم

 (( لا يؤمن احدكم حتى يحب لاخيه ما يحبه لنفسه ))

البشر لما تخلت عن الانانيه مثل ما خليت اللي جاي من البوابه الاولى يدخل من غير ما انقز جدامة و امنعه و حبيت انه يدخل مثل ما انا ابي ادخل و بنفس الوقت دخلت بعده على طول عشان ما يتاخر اللي وراي صرنا منظمين و الكل حصل على اللي يبيه بسرعه تفيد الجميع

طبعا اغلب الفضل من بعد الله لاول كم شخص دخلوا بالبوابة الثانيه

كم من وزارة و مكان عمل في البلد يتبع البوابه الاولى؟!!!

و منو يعتمد طريقة البوابه الثانيه ؟!!

اللي تعلمته اني احافظ على النظام في اي مكان اعمل فيه عشان اقدر اوفر بيئة مناسبة للانجاز

و اذا كنت من الاوائل احاول اطبق النظام عشان الكل يستفيد و اللي من بعدي يرتاح

حتى لما اكون واقف في طابور الجمعيه او السوبرماركت او ناطر رقمي عند طبيب الاسنان مثلا (( و ركزوا حيل على هذه لاني تعبت منها ))

 بايد كل واحد فيكم انجاز كبير للمؤسسه اللي يعمل فيها و للمجتمع اللي عايش فيه

من الايمان انك تساهم بهالانجاز

من الوطنيه ان تساهم بهذا الرقي

و من مصلحتك و مصلحة ابنائك حتى لا تعاني بالمستقبل

انجز دورك بالمجتمع

..................................

اعذروني غبت عنكم فترة لكن كان لي سببين

 الاول الكتابة بالمدونه محتاج قعده بمزاج و هذا صار صعب و كان تويتر متنفس لهذه الكلمات مع الفيس بوك

و السبب الثاني مللت من الانجاز باعمال قليلة و بكلمات كثيره و قاعد احاول اشغل نفسي باشياء اكثر فائده لي و لمجتمعي و دعاوتكم بهذا الخصوص

و صج لكم وحشه يا الغالين

و مبارك عليكم الشهر جميعا

ليت الزمن يرجع و ننعم في بساطتنا

 

ساعات اتمنى لو عندي جهاز مثل الريموت كنترول للزمن

 اعيد لحظات في عمري و اشغلها على البطيء

و بعضها والله ودي وقف عليها من حلاوتها

و اخر شي ارجع طفل

اكبر همومي لعبه و شلون اصرف الدينار اللي عندي

_هذا لما اكون غني_

تلاقيني اتهاوش مع صاحبي و طق و سب و اللي يشوفنا يقول يا ذابح يا مذبوح و بعدها ثاني يوم

اكون معاه كانه ما حصل شي ابد لا و اذا كان متهاوش تلاقيني اطب معاه

كان المضحك انه الكل ربعك يعني فجاه اخلص من لعبه في مدينه الترفيهيه ايام عزها

وارجل للوالد و اقوله صديقي فلان .. وطبعا فلان هذا تعرفت عليه قبل دقيقه ونص

العلاقات بسيطه الحياه بسيطه

شخص ما تحبه تقولهاعلى طول مافيه نفاق و اللي تعزه تعطيه عيونك

عالم جميل جدا .... تعرفون ليش

لانه عالم بسيط ... خالي من التعقيدات اللي احنا صنعناها لانفسنا

كنا مو فاضين نحط العقد و الحواجز قدام انفسنا

كان هدفنا نستمتع باللحظه .... ما نفكر في بكره و همومه ... ولا امس و احزانه

الاجمل هو الصدق .... لما كنت صغير ايام الغزو العراقي الغاشم فجاه الوالده تدورني ولا تلاقيني قاعد في زاويه ابكي و ادعي ربي

يا رب احم الكويت وردنا لها يا ربي احمي كل الكويتيين

كانت دعوه باخلاص و صدق و محبه

ودموعي تارسه وجهي وعاد اسمع صوت التنهيد و سحبت النفس شلون من قلب

... ما فكرت وقلت يا رب تحمي بس الفلاني و العلاني اما هذولاك لااا الله ياخذهم

مثل اللي حاصل الان من تقسيم غبي يفرق حتي بين الاخ و اخوه

وكل واحد يتصيد على الثاني

اتمنى نتعلم من الاطفال شلون يكون كل واحد فينا انسان بمعنى الكلمه

في الشهر اللي فات كنت اشتغل في عيادات الاطفال

تعلمت اشياء ما توقعت اتعلمها بهذا المكان وخصوصا من الاطفال

مثل ما قلت حق صاحبي قبل كم يوم

تعلمت اساسيات العلاقات الانسانيه

كلمه معقده شوي .. ادري .. بس لازم يعني دكتور و فيلسوف لازم اتفلسف عليكم شوي تحملوني

لو تسال كل شخص شنو يبي ؟

يمكن يقولك الف شي و شي

لكن الصج هو او هي بس يبون يشعرون بالامان ، بالثقه في الشخص اللي قدامه ، بالراحه

و ترا كل الطلبات الثانيه مجرد امور ثانويه اذا هذا ما تحقق انت او انتي ما سويتوا شي ابدا

لكن لو تحقق يا سلام

بقولكم حادثتين حصلت بعيادات الاطفال خلتني افكر بهذا الشي و استنتجه

اول حادثه

 جاني ولد عمره ٧ سنوات

طبعا كان تعاملي حلو معاه

و مافيه تخدير موضعي قبل الابره الا وحطيته و احلى واحد يشتت انتباهه عشان ما يشوف الابره و معطيها على احلا مكان

بس الولد جنني على ما خلصت علاجه ... ليش ؟!! لاني اهتميت بالحاله من ناحيه الطبيه و نسيت النفسيه

صحيح عضويا ما كان يحس بالم ابدا لكنه كان باختصار خايف

خصوصا بيني و بينكم شكلنا على الماسك و لبس الفضاء مالنا .. تقول بنسوي فيه تجارب مو نعالجه

المهم

 في الحادثه الثانيه فيه بنت جتني عمرها ٨ سنوات _ الله حفظها _

لا تشوفوني لما دخلت هلا والله ... منو هالحلوه اللي دخلت .. مدحت فيها بشكل مو طبيعي

و تصدقين اسمك نفس اسم اختي الصغيره ..

ما شاء الله الملابس هذه من وين شارينا بجيب نفسها ...

 حسستها اني بالفعل اعزها و شعرت اني قريب

مو الدكتور ابو ابره اللي يخرع و ما يحبنا بس يبي يعورنا

تخيلوا تسالني بعدها شنو بتسوي اقولها و انا اضحك مالك شغل ..

 كيفي  بسوي اللي ابيه هذه الاسنان حقي مو حقك لا و تفغص في خدودها و مجننها شوي

لكن كل شي عدا على خير بدون صياح ولا شي بالعكس لما خلصت كل شوي داشه العياده تسلم و تلعب و تقول ما ابي احد يعالجني الا هذا

السؤال ليش ؟. هل لاني احسن دكتور في العالم ؟ يمكن :) بس لا مو هذا السبب

الاخصائي الموجود احسن مني مليون مره ... لكنها شعرت بالامان و الثقة

هذا ما نحتاجه في حياتنا ان نشعر بالامان و الثقه في بعضنا

اقولها مره ثانيه خلونا نتعلم من الاطفال من الزمن الجميل

للاسف ناخذ عمرنا كله عشان نتعلم شلون نعيش افضل  ونغير بطرق حياتنا و تعاملنا مع البشر

لكن بالنهايه نكتشف انه و احنا صغار كان عندنا سر الحياه السعيده

نقضي كل عمرنا حتى نصل لنفس النقطه اللي ابتدينا فيها

طبعا هذا المحظوظ منا

 

اغنيه البوست

على طاري هذا الموضوع اهدي لكم اغنيه

عيال حارتنا ... لعلي بن محمد

ياليت ان الزمن يرجع ورى ولا الليالي تدور
ويرجع وقتنا الأول وننعم في بساطتنا