الخطة الرمضانيه

مبارك عليكم الشهر جميعا

ولله الحمد انه كتب لنا عمر نحضر فيه رمضان و لذه رمضان

تصدقون والله اني مشتاااااااااااق لرمضان ..... مشتاق لصلاه التراويح .... مشتاق لصلاه القيام .. مشتاق للمه الحلوه على الفطور

و الصغار يسوون نفسهم كبار ما ياكلون إلا مع الاذان مع انهم فاطرين :)

مشتاق للزيارات من بعد صلاه التراويح للاهل والاصحاب ..... حتى الفيمتو مشتاق لها ما ادري ليش ما يحلا إلا في رمضان

في السنوات اللي فاتت كنت ما احضر رمضان في الكويت إلا اخر يومين او 3 ايام فقط

الحمد الله هالسنه ان شاء الله من اوله

صحيح مع الاهل و الاصحاب ولكن هنالك اصحاب يعز علينا بعدهم عنا في رمضاننا هذا

كانوا لنا خير رفقاء في صومنا و فطورنا في السابق

الله يذكرهم بالخير و يتقبل صالح اعمالهم

القريب الله يحفظه لنا و البعيد الله يجيبه



عندي فكره في رمضان هالسنه غير كل سنه

بما اني داخل نظام التخطيط و داش جو قلت اكملها في رمضان خير الشهور

و فكرة احط اهدافي في رمضان و اشوف اقدر عليها ولا لا

واتمنى منكم تسوون نفس الفكره عشان تعرفون كم حققتم من انجاز





اهدافي الرمضانيه لعام 2010

(( لا تسألوني عن الهجري و تفشلوني ))



اول هدف هو ان اعبد الله حق عبادته ... اللي الله يقدرني عليه

وان اجمع اكبر قدر ممكن من الخير في شهر الخير

حتى افوز بالرحمه في اوله و المغفرة في منتصفه و العتق من النار في اخره



ثاني هدف وهو تقريبا يتبع الاول هو قرأت القرأن ...... طبعا الكل بيقول مو جديده الكل ناوي يقرى قرأن برمضان

بس انا غير هالسنه انا ما ابي اقراه بصوتي او بعيوني فقط

لا

انا ابي اقراه بروحي و عقلي و قلبي ...... ابي اقرأ القرأن صح ...... ابي اقراه بتمعن افهم اللي اقراه عدل

مو كانه واجب علينا منو يخلص اسرع و بس

اذا هدفي الثاني هو قرأت القرأن بتدبر حتى يأثر فيني بصوره ايجابيه و يحسن مني




هدفي الثالث ان استمتع بنهار رمضان و ان أؤدي اعمالي باكمل وجه ... كما افعل في باقي الشهور و ربما افضل

يعني مو اذا انا صايم يكون مالي خلق العمل و طناش و عطل الناس و العالم لاني مسكين صايم

لا الصيام يعني النشاط و التخلص من السموم و تقدير نعم الله علينا





هدفي الرابع : يمكن ما يكون رمضاني و لكن توقيت رمضان وجب علي ان اضعه من اهدافي الرمضانيه هدفي هو الدراسه من اجل اختبار الزماله لكليه الجراحين البريطانيه

عاد الهدف هذا بالذات الله يعيني عليه ما بقى وقت على الاختبار و يبون يختبروني في مجلدات

وعاد الجو عندنا مو جو دراسي كلش ..... يحث على التعبد و متابعه المسلسلات و الزيارات

بس بنحاول ان شاء الله و نتعبد بالدراسه فالعلم عباده

عاد دعواتكم معاي في هالشهر الفضيل





هدفي الخامس : ممارسة الرياضه ولا انجرف امام الطعام

عاد هاذي اللي صج قويه ..... ودي اصدق بس قويه

صج ما راح اطنش اللقيمات (( لقمة القاضي )) ولا اكل رمضان اللي ما يتطوف .... هالتشريب و الجريش و الهريس

.... هذا من اللحين بديت اخرب هدفي :)

لا باكل ولكن بالمعقول ما ودي اكل اكل شهر في يوم مثل ما احنا متعودين

لا ناكل مثل كل يوم من غير ما نسرف في اكلنا و تصيبنا هالتخمه من هواش الاكل داخل بطونا




اعتقد هالاهداف كفايه على شهر ... وان شاء الله اقدر عليها لانه فيها اهداف كل واحد فيهم يبيله شهر بروحه

بس الله بيعين و انتم طبعا ما راح تنسوني بصلاتكم ..... ترى الدعاوي الطيبه ترجع لكم انتم بعد

يعني بلا بخل بهالشهر الفضيل و كثروا دعاء لي انا العبد الضعيف :)

..............

بأنتظار مشاركاتكم و ابي اعرف اهدافكم الرمضانيه