السبت، 13 أغسطس، 2011

انت وانتي سبب فخري

الحمد الله اللي خلقني مسلم كويتي خليجي

هاذي العباره مو عنصرية لكن من حقي ان افتخر بمن انتمي لهم لانهم بالفعل مدعاة للفخر

و افعالهم الاخيرة خير دليل على ذلك


فيه شباب اخوان بتويتر يقولون ان الشعب الكويتي راعي هبة حتى في الوقوف مع القضايا العامه

وانه مثل المدونات كقطع الدومينو ما ان تسقط الاولى حتى تلحقها الاخرى

لكني اراه بمنظور اخر و يمكن تجلى لي بالفترة الاخيرة بشكل اكبر


شعور المجتمع الكويتي بانه جزء لا يتجزء من الجسد الاسلامي اللي صوره بوقوفه مع اخوانه المسلمين في سوريا و الصومال بشكل خاص بالفترة الاخيرة
شعور لا يوصف من الفخر


تشوف الناس تتكلم بحرقة عن الظلم اللي يعانون منه اخوانهم بسوريا او ليبيا و تشعر بالامهم
حتى خرجوا باعتصامات و مظاهرات من اجلهم

و حتى اخواننا بالصومال نحزن لمجاعتهم
 و الكل ساهم بالحملة التي تريد انقاذهم و مازالوا يساهمون
حتى اخوي الصغير جاي ينظم حملة تبرعات عندنا بالعايلة


هذا شي مو هبة ولا مجرد حب ظهور يمكن يكونون قلة قليله جذيه
 لكن السواد الاعظم تشعر بصدقهم و انه اقصى ما يتمنون هو رفع الظلم عن اخوانهم


شعرت بالفخر لما قدر الشعب الكويتي يشكل ضغط على الحكومه
شعرت بالفخر لما سمعت بخبر طرد السفير


شعرت بفخر كبير و خنقتني العبرة عندما سمعت اخواني السوريين الاحرار الشجعان و هم يهتفون لشعب الكويت وهم في سوريا امتنان لما قام به 
 هذا الشيء جعلني اشعر انه ما نقوم به قد يساعدهم


اهتمام الشعب الكويتي بالقضايا العامه و شعورة بالمسئوليه شيء رائع
و الاحساس بانه قد يستطيع مساعدة اخوانه المسلمين في كل مكان
متجاوز بذلك حدود دولة الكويت
انه شيء جبار
لانه يضع الكويت في محورها المناسب


واننا لسنا باستقلاليه عن مشاكل المسلمين

قال رسول الله صلى الله عليه وسلم


(( مثل المسلمين في توادهم و تراحمهم كمثل الجسد الواحد اذا اشتكى منه عضو تداعى له سائر الجسد بالسهر والحمى ))


يا شعب الكويت الكريم


اني افخر بكم و بكل شريف يشعر ان له دور يؤديه من اجل رفع الظلم عن اخوانه في كل مكان
و في تطوير مجتمعة الكويتي و الاسلامي


الف شكر لكم لانكم جعلتموني اشعر بانه لنا تاثير


الحمد لله الذي خلقني مسلم كويتي
انها ليست عنصرية لكنه شعور جميل بانتمائي
















الاثنين، 8 أغسطس، 2011

بوابة المقبرة تختصر مجتمع

صورة ليست لبوابة المقبره

 
دائما اتذكر كلمة خالي المؤمن كٓيسٌ فَطِن مو كيس قطن
.. عشان جذيه تعودت اني اشوف الامور بنظرة ثانيه ممكن تفيدني بحياتي
 و مثل اليوم المقبرة لفتت نظري باشياء يمكن ما كنت انتبه لها

من بعد صلاة العصر رحت المقبرة ولا الناس توها طالعه من المسجد
و بتركب سياراتها تدخل المقبرة لمكان الدفن و الصلاة على الموتى _الله يغفر لهم و يرحمهم برحمته و يثبتهم عند السؤال_


ادارة المقبرة فتحت باب الدخول و الخروج لدخول المقبرة عشان يقللون الزحمه على خلق الله


الباب اللي عنده تتغير نفوس البشر
 و تغسل من امور كثيرة منها الانانيه و الغرور
 فتلاقي الناس متسامحه مع بعضها يعني لما تزدحم الطرق ما تسمع ولا هرن او كلكس مثل ما يسمونه اهل السعوديه الكل ينتظر دورة


الغريب في البوابه انها صنفت البشر
 فالناس عند البوابه كانوا موقفين سياراتهم على جانب الشارع و بعض الناس بيطلعون اول عشان يلحقون على صلاة الميت


في البوابه الثانيه كانوا يسمحون لبعض بالمرور من غير ما يزاحمون بعض و شغل النحاسه اللي يصير في شوارعنا
اللي من اول ما تعطي اشارة الا ابو الشباب دايس حده عشان يغطي عليك
_للامانه ساعات اكون منهم لما ازهق من ام الزحمة و من اللي يدخلون علي من حارة الامان _

البوابه الاولى محد كان يقدر يتحرك لا و بعضهم كان بالاخير يدخل على البوابة الثانيه لكن بنفس نظامها هي و يمشي بسلاسه 



الكل نيته صافيه ان شاء الله .. لكن النيه الصافيه بس مو كافي و هذا مثل مجتمعنا

اللي يحب الوطن كثير .. لكن اللي يعمل من اجله بنظام مثل ما صار بالبوابه الثانيه هم اللي يفيدونه


مشكلتنا مو بحب الشي ولا بنيتنا الصافيه المشكله تتلخص بالنظام و نتذكر حديث نبينا المصطفى محمد صلى الله عليه وسلم
 (( لا يؤمن احدكم حتى يحب لاخيه ما يحبه لنفسه ))


البشر لما تخلت عن الانانيه مثل ما خليت اللي جاي من البوابه الاولى يدخل من غير ما انقز جدامة و امنعه و حبيت انه يدخل مثل ما انا ابي ادخل و بنفس الوقت دخلت بعده على طول عشان ما يتاخر اللي وراي صرنا منظمين و الكل حصل على اللي يبيه بسرعه تفيد الجميع

طبعا اغلب الفضل من بعد الله لاول كم شخص دخلوا بالبوابة الثانيه

كم من وزارة و مكان عمل في البلد يتبع البوابه الاولى؟!!!
و منو يعتمد طريقة البوابه الثانيه ؟!!



اللي تعلمته اني احافظ على النظام في اي مكان اعمل فيه عشان اقدر اوفر بيئة مناسبة للانجاز
و اذا كنت من الاوائل احاول اطبق النظام عشان الكل يستفيد و اللي من بعدي يرتاح

حتى لما اكون واقف في طابور الجمعيه او السوبرماركت او ناطر رقمي عند طبيب الاسنان مثلا (( و ركزوا حيل على هذه لاني تعبت منها ))



 بايد كل واحد فيكم انجاز كبير للمؤسسه اللي يعمل فيها و للمجتمع اللي عايش فيه
من الايمان انك تساهم بهالانجاز
من الوطنيه ان تساهم بهذا الرقي
و من مصلحتك و مصلحة ابنائك حتى لا تعاني بالمستقبل

انجز دورك بالمجتمع


..................................




اعذروني غبت عنكم فترة لكن كان لي سببين
 الاول الكتابة بالمدونه محتاج قعده بمزاج و هذا صار صعب و كان تويتر متنفس لهذه الكلمات مع الفيس بوك
و السبب الثاني مللت من الانجاز باعمال قليلة و بكلمات كثيره و قاعد احاول اشغل نفسي باشياء اكثر فائده لي و لمجتمعي و دعاوتكم بهذا الخصوص
و صج لكم وحشه يا الغالين
و مبارك عليكم الشهر جميعا

















الثلاثاء، 12 أبريل، 2011

ليت الزمن يرجع و ننعم في بساطتنا


 
ساعات اتمنى لو عندي جهاز مثل الريموت كنترول للزمن
 اعيد لحظات في عمري و اشغلها على البطيء

و بعضها والله ودي وقف عليها من حلاوتها

و اخر شي ارجع طفل
اكبر همومي لعبه و شلون اصرف الدينار اللي عندي
_هذا لما اكون غني_

تلاقيني اتهاوش مع صاحبي و طق و سب و اللي يشوفنا يقول يا ذابح يا مذبوح و بعدها ثاني يوم

اكون معاه كانه ما حصل شي ابد لا و اذا كان متهاوش تلاقيني اطب معاه

كان المضحك انه الكل ربعك يعني فجاه اخلص من لعبه في مدينه الترفيهيه ايام عزها

وارجل للوالد و اقوله صديقي فلان .. وطبعا فلان هذا تعرفت عليه قبل دقيقه ونص

العلاقات بسيطه الحياه بسيطه

شخص ما تحبه تقولهاعلى طول مافيه نفاق و اللي تعزه تعطيه عيونك

عالم جميل جدا .... تعرفون ليش

لانه عالم بسيط ... خالي من التعقيدات اللي احنا صنعناها لانفسنا

كنا مو فاضين نحط العقد و الحواجز قدام انفسنا

كان هدفنا نستمتع باللحظه .... ما نفكر في بكره و همومه ... ولا امس و احزانه

الاجمل هو الصدق .... لما كنت صغير ايام الغزو العراقي الغاشم فجاه الوالده تدورني ولا تلاقيني قاعد في زاويه ابكي و ادعي ربي

يا رب احم الكويت وردنا لها يا ربي احمي كل الكويتيين

كانت دعوه باخلاص و صدق و محبه

ودموعي تارسه وجهي وعاد اسمع صوت التنهيد و سحبت النفس شلون من قلب

... ما فكرت وقلت يا رب تحمي بس الفلاني و العلاني اما هذولاك لااا الله ياخذهم

مثل اللي حاصل الان من تقسيم غبي يفرق حتي بين الاخ و اخوه

وكل واحد يتصيد على الثاني

اتمنى نتعلم من الاطفال شلون يكون كل واحد فينا انسان بمعنى الكلمه

في الشهر اللي فات كنت اشتغل في عيادات الاطفال

تعلمت اشياء ما توقعت اتعلمها بهذا المكان وخصوصا من الاطفال

مثل ما قلت حق صاحبي قبل كم يوم

تعلمت اساسيات العلاقات الانسانيه

كلمه معقده شوي .. ادري .. بس لازم يعني دكتور و فيلسوف لازم اتفلسف عليكم شوي تحملوني

لو تسال كل شخص شنو يبي ؟

يمكن يقولك الف شي و شي

لكن الصج هو او هي بس يبون يشعرون بالامان ، بالثقه في الشخص اللي قدامه ، بالراحه

و ترا كل الطلبات الثانيه مجرد امور ثانويه اذا هذا ما تحقق انت او انتي ما سويتوا شي ابدا

لكن لو تحقق يا سلام

بقولكم حادثتين حصلت بعيادات الاطفال خلتني افكر بهذا الشي و استنتجه

اول حادثه
 جاني ولد عمره ٧ سنوات
طبعا كان تعاملي حلو معاه

و مافيه تخدير موضعي قبل الابره الا وحطيته و احلى واحد يشتت انتباهه عشان ما يشوف الابره و معطيها على احلا مكان

بس الولد جنني على ما خلصت علاجه ... ليش ؟!! لاني اهتميت بالحاله من ناحيه الطبيه و نسيت النفسيه

صحيح عضويا ما كان يحس بالم ابدا لكنه كان باختصار خايف

خصوصا بيني و بينكم شكلنا على الماسك و لبس الفضاء مالنا .. تقول بنسوي فيه تجارب مو نعالجه

المهم
 في الحادثه الثانيه فيه بنت جتني عمرها ٨ سنوات _ الله حفظها _

لا تشوفوني لما دخلت هلا والله ... منو هالحلوه اللي دخلت .. مدحت فيها بشكل مو طبيعي

و تصدقين اسمك نفس اسم اختي الصغيره ..
ما شاء الله الملابس هذه من وين شارينا بجيب نفسها ...
 حسستها اني بالفعل اعزها و شعرت اني قريب

مو الدكتور ابو ابره اللي يخرع و ما يحبنا بس يبي يعورنا

تخيلوا تسالني بعدها شنو بتسوي اقولها و انا اضحك مالك شغل ..
 كيفي  بسوي اللي ابيه هذه الاسنان حقي مو حقك لا و تفغص في خدودها و مجننها شوي


لكن كل شي عدا على خير بدون صياح ولا شي بالعكس لما خلصت كل شوي داشه العياده تسلم و تلعب و تقول ما ابي احد يعالجني الا هذا

السؤال ليش ؟. هل لاني احسن دكتور في العالم ؟ يمكن :) بس لا مو هذا السبب

الاخصائي الموجود احسن مني مليون مره ... لكنها شعرت بالامان و الثقة

هذا ما نحتاجه في حياتنا ان نشعر بالامان و الثقه في بعضنا

اقولها مره ثانيه خلونا نتعلم من الاطفال من الزمن الجميل

للاسف ناخذ عمرنا كله عشان نتعلم شلون نعيش افضل  ونغير بطرق حياتنا و تعاملنا مع البشر

لكن بالنهايه نكتشف انه و احنا صغار كان عندنا سر الحياه السعيده

نقضي كل عمرنا حتى نصل لنفس النقطه اللي ابتدينا فيها

طبعا هذا المحظوظ منا

 
اغنيه البوست

على طاري هذا الموضوع اهدي لكم اغنيه

عيال حارتنا ... لعلي بن محمد

ياليت ان الزمن يرجع ورى ولا الليالي تدور
ويرجع وقتنا الأول وننعم في بساطتنا


السبت، 2 أبريل، 2011

امواج الموت و المتعه


بوست اليوم بيكون مع حادثة الغرق الوشيك اللي كاد ان يحصل لي في الامارات و الله ستر

مثل ما وعدتكم البوست اللي فات ..

والان لكم قصتي مع الامواج

...........
في سفرتي الاخيره لدبي من ضمن خططي كان تغيير الفنادق كل يومين عشان يكمل هدف تغيير الروتين

و حجزت في فندق على شاطيء الجميرا .. اول ما دخلت الغرفة .. كانت بالدور السادس عشر

فتحت البلكونه ولا المنظر ما شاء الله ... البحر العجيب و صوت الموج رائع و الهوا طيب ما شاء الله

كان شكل البحر يقولك انت غلطان لو ما جيت تسبح اللحين

انا ما صدقت خبر و على طول بدل و انزل

شفت حمام السباحه قلت يالله يا ولد يا شاطر صار لك فتره ما سبحت بحمام السباحه خلني اسخن فيه قبل البحر

نزلت حمام السباحه و تعرفون لازم شويه برستيج نزل النظاره على الكرسي و حط فوطتك و عطها كم حركه كانك فاهم السالفه و تسخن

لانك سباح اولمبي ما شاء الله و حاصل على عشر تعش ميداليه الماسيه

عاد انا فيني طبع خايس تتوقعون انزل اسبح على المزاج و استمتع بالماي

لا لايمكن لازم اعدي حمام السباحه اما غوص نفس واحد مسوي نفسي دلفين

ولا سباحه حره لكن لازم اسرع شي

ما ادري قاعد اسابق احد ولا حاط في باللي بيعطوني نقاط ولا جائزه

المهم بعد ما تعبت نفسي شوي و قاعد اسمع صوت البحر يناديني بكل شوق و لهفة

قمت اخذت الفوطه و لابس النظاره تقول بتمشى على شواطئ ميامي

لا تشوفون الموج وقتها مو طبيعي ... اجراااام

تشوفون الناس اللي على الشاطيء
اللي يسوي قلعة رمليه
 و اللي يتشمس مو عاجبهم البياض اللي فيه يخرب بيتهم.. حقدت عليهم شوي عادي

ولا اللي داخل البحر و مستمتعين بالموج و الاحلى اللي على الالواح يركبون الموج

قلت ما يبيلها عاد ....

ها انا ات لك يا بحر الخليج احتضنك بشوق

كان الماي عجييييييييييب فيه بروده خفيفه خصوصا مع كل موجه جديده اخترقها

كنت اصد الموج و انا واقف .. الماي كان واصل تقريبا لحد ركبي

قلت ادخل اكثر.. و مع متعة الموج ادخل بعد و ادخل بعد

وقتها قلت لا لازم اتسبح ضد الموج خل استانس

ما ادري يمكن خمس ثواني تسبحت بس

و وقفت اطالع وراي و لا الشاطيء بعييييييييد

و احلى واحد يبلع ريقه .... ادري اني اعرف اتسبح بس مو خمس ثواني ابعد اكثر من خمس مائه متر

قلت ما يبيلها عاد ارجع

قمت اسبح ...

اسبح ...

اسبح....

احس اني ما اتحرك الا اربع امتار ... هذا اذا تحركت اصلا

حسيت بالعضلات بدت تفتر خصوصا انتي شديت عليها في حمام السباحه

قلت لا لازم اسبح بقوه عشان اوصل لانه اذا قعد شوي اكيد بغرق

قمت اسبح بقوه لكن المصيبه

اني اتقدم مع الموج لك لما يرجع الموج يسحبني اكثر و مهما حركت رجولي او ايدي ما ينفع

و بعد كم مره ابي اخذ النسم ولا بدال ما اتنفس هوا

يضربني الموج ويمنعني من التنفس

شعور الله لا يوريكم اياه و لا يمر علي غالي
بعد ما شديت حيل على نفسي رجلي لمست الارض

اخيرا

على طول طبعا ثبتها في الارض

لكن كان البحر يقول هيهات

الموج سحبني مره ثانيه لداخل البحر

في لحظه صرت اطالع الناس على الشاطي ... محد منتبه لي .. و ولا احد دراى عني

مافي منقذين ...
انا اصلا بروحي ...
و حتى اللي على الشاطيء مو منتبهين انه فيه بني ادام قاعد يصارع الامواج بس عشان يتنفس و يوصل

في لحظه فكرت انادي باعلى صوتي يمكن احد يقدر ينقذني

بس ما ادري يمكن عنجهيه فيني و لا كبر

ما كنت ابيهم يشوفوني في لحظة ضعف

مو وقته تطلع عنجهية العرب البايخه هاذي صح
فقمت شديت حييييل على نفسي و اسبح مع كل موجه .. استخدم قوتها لمساعدتي و دفعي للامام  و لما المس الارض برجلي

قبل ما تسحبني الموجه للبحر اثبتها بكامل قوتي في الارض

صحيح تسحبني بس على الاقل تسحبني متر ولا تسحبني اربع امتار

قعدت اسوي هذه الحركه لين ما الماي وصل تقريبا لركبي

طبعا هذا بكون مستوى الماي لو وقفت

لكن في ذاك الوقت ما كنت اقدر اوقف على رجلي

تخيل انه كل عضلاتك استهلكوا اكثر من طاقتهم

كنت انتظر قوة الموج توصلني اول الشاطئ

تخيلوا كاني قاعد و انتظر كل موجه ترسلني للشاطئ

حتى كان فيه ولد يمكن عمره سبع سنوات يطالعني باستغراب
 شفيه هذا يستهبل ليش ما يوقف

قعدت شوي و الحمد الله وصلت الشاطئ

طبعا مو مستوعب اللي صار لي

ثواني بس كانت تفصلني عن الغرق و الموت

و هي ثواني بس اللي وصلتني لهذه المرحله

و جتني نفس العنجهيه .. استجمعت كل قوتي عشان اوقف و اروح اقعد عند اغراضي و كانه ما حصل لي شي

كاني ما كان يفصلني عن الغرق و الموت يمكن خمس ثواني

شكرت ربي على نعمتة ... لانه اكيد اكيد اكيد مو قوتي و لا سباحتي اللي طلعتني من هالبحر لاني قعدت لحضات فيه بكل قوتي

ما قدرت اتغلب عليه

لكن انا عندي ايمان ان الله بعث لي ملك هو اللي ساعدني و قربني للارض

اللهم لك الحمد على نعمتك ...
دتعلمت شي من هذه الحادثه .. كلمة اسمعها و لا كنت ماخذها في البال صحيح البحر غدار

لكن الاكبر هو انه البحر هو الدنيا

احنا كل يوم نصارع امواج من المصاعب و الهموم في حياتنا

والحل في حياتنا هو نفسه الحل و الاستراتيجيه اللي انقذتني بعد الله من البحر

الايمان بالله و ان كنت في لحظات فقدت الثقة بعودتي لكن لم افقد الثقة بالله

ثانيا انه كنت استخدم كل موجه و قوتها بمساعدتي للوصول لبر الامان و قبل ان تسحب الموجه للبحر كنت اثبت قدمي في الارض

حتى لا اسمح لها بسحبي و بعيدا عن هدفي .. و كررت هذه التقنيه حتى وصلت

و هذه الحياه .. يجب ان نستخدم قوتها و كل موجه حتى نصل لاهدافنا و قبل ان تسوء الامور
 نثبت انفسنا حتى نتجاوز هذه الفتره ثم نركب ثاني موجه باتجاه هدفنا

في هذه اللحظات صج تشعر بقيمة كل ثانيه في حياتك

صحيح انه الثانيه الوحده تفرق كثير في حياة الناس

اكتشفت ان الدقيقة جدا طويله

60 ثانيه ... احد بيحس بقيمتهم ؟!!!

حط راسك تحت الماي و اكتم النفس لمده 60 ثانيه و خل عينك على الساعه

راح تحس انها مو راضيه تمشي

تدرون شنو الشيء اللي اثبت اني بالفعل مجنون ..

 مو اني رجعت البيت بعدها ريحت شوي و كملت يومي كانه ما حصل لي شي لا

الجنون كان انه بعدها بيومين رحت لنفس المكان رحت للبحر .. اواجه الامواج مرة ثانيه

لا تقولون شفيه هذا فصل ما تعلم من المرة الاولى

صحيح يمكن اكون مجنون اني رحت اسبح مره ثانيه لكن في هذه المره كنت اعرف حدودي

و اعرف شنو الشي اللي احرص اني اسويه واللي ما اسويه عشان ما اطيح بنفس المشكله

و لله الحمد كانت امواج رائعه و السباحه فيها قمة المتعه

استمتعت ولكن لم انسى غدرها ... و بنفس الوقت ما خليت الخوف و هذه التجربه السيئه توقف في وجه استمتاعي بالامواج

هذا هو انا ... قد اكون مجنون لكني حذر بنفس الوقت ... شلون .. ما ادري

اهم شيء الاستمتاع بالحياة و التعلم من كل موقف يحصل لك فيها



الأحد، 27 مارس، 2011

من الصحراء الى السماء



كلمه اعجبتني جدا في رحلتي من الارض لاعلى مبنى في العالم باسرع مصعد بالعالم

دبي المدينه اللي كنت ما اتوقع اني باستمتع فيها بهذا الشكل
 و كان اساس الرحله هي الراحه وتغيير الروتين

لكنها كانت رحله ممتعه لاخوننا بالامارات سوف تتكرر باذن الله كثيرا

الجميل في دبي هي روح التحدي فيها

 كيف تم بناء اعلى مبنى بالعالم ..
 اكبر منحدر مغلق للتزلج ...
 جزر النخيل التي تعتبر من المعجزات الهندسيه ...
حتى الصين استوردوها و وضعوا سوق لهم هناك
حتى انا حبيت التسوق بسبته

والاجمل انها بالفعل مدينه عالميه ... فيها اشخاص من كل دول العالم

وهنالك مارست هوايتي الحبيبه وهي تعلم لغات العالم

و وضعت لنفسي تحدي
 كيف ممكن في خلال دقائق بسيطه ان اتعرف على شخص غريب و ان اوصل له صورة جميله عني و بنفس الوقت اكون مثال جيد لدولتي الحبيبه
بدون كذب طبعا وتاليف

لم اكن اتخيل انه سوف يكون بهذه السهوله

اكتشفت ان الناس تضع قيود وهميه امام بعضها و تبني افكار مسبقه فقط من خلال شكل اللي مقابلها

معرفة ولو كلمتين من لغة الشخص اللي تكلمه يكسر الكثير من القيود و الحواجز

ولله الحمد الان استطيع بشكل اساسي ان اقول كيف الحال و شكر باكثر من ١٢ لغه :)
(( حدي مستانس)) _ كبر راسي_

ما تعرفون هالكلمتين كيف تكون كالسحر

مرة دخلت على كافيه جاني الويتر كان هندي سلمت بالاوردو بعدها قلت من وين طلع من منطقه تتكلم لغه ثانيه غير الاوردو قلت لي كلمتين بهاللغه

لا تشوفون الابتسامه اللي بوجهه مو طبيعيه ينفع دعايه اسنان
 
وصلت الطلب فلبينيه و سويت نفس الحركه و كانت نفس النتيجه

واشوفهم يتكلمون عني و حدهم مستانسين جاني المدير الباكستاني
 ويسال شلون الكافيه و الاكل و طبعا ما اخليه لازم اتفلسف و ابين له اني اعرف كلمتين بالباكستاني

وجت صينيه و قلت شكرا بالصيني تشي تشي

بعدها خل اعدي قدام الكافيه يا سلام اتوقع ما يقابلون صاحب الكافيه بنفس الحفاوه

طبعا اللحين بتقولون نص لغاتك اللي تعرفها لغات عمال :)

تصدق هي اللي تنفعك اكثر ... لا تشوفون الخصومات اللي عدت اربعين في الميه في بعض الاماكن

ولا الخدمه المتميزه بنفس حلوه ولا النصايح اللي اخذتها

والاهم لما يسالون انت من وين و اقول الكويت

على طول تثبت فيهم الصورة الطيبه عن بلدي الحبيب

اجمل ما في الرحله انها كانت مع نفسي يعني رايح مزاج بروحي

ادري بتقولون مجنون شوي عادي هذه الحقيقه

ايضا اكثر شي غيرني

هو نظرتي للمشاريع الجباره التي تم انجازها و ثبتت في روحي كلمة 

من الصحراء الى السماء

تنظيم جبار من الانشاءات الى المترو و التاكسي و النقل بشكل عام الى الترفيه

امر يستدعي التامل و التدبر فيه

تجربة التزلج جميله .. نافورة دبي مول خيال ما مليت منها ابد كل عرض اشوفه

.... تجربه السوق الصيني اكثر من رائعه لولا الوزن بالطياره كانت علوم

يمكن ارد معاي اكثر من خمسين كيلو من المشتريات

ونصيحه اللي يروح دبي و ما راح عالم فيراري ماله داعي

عالم فيراري لوحده تجربه فريده و الاروع اني رحت عكس الخليجيين وبالتالي ما كان فيه زحمه

مثل الاهل قعدوا ساعتين قدام اللعبه في وقت انا قعد عشر دقائق

اسرع افعوانيه او قطار موت مثل ما نحب نسميه .... تجربه خيال
حتى لعبه تصنيع سياره فيراري رائعه

وعندهم عرض بهلواني من اجمل ما رأيت من العروض بالفعل محترفين
خرجت وانا احب فيراري و احب ايطاليا. لهذه الدرجه كانت التجربه مميزه

تساؤل اخليكم تبحثون فيه كم المده الزمنيه التي تم بها بناء برج خليفه ؟
و كم المدة الزمنيه التي تم بها بناء استاد جابر الدولي ؟!
بما اني طولت عليكم

اخليكم الان بحفظ الله

البوست الجاي بتكلم عن قصتي مع الامواج اللي كادت تقضي علي و تقتلني

في امان الله

وصج اللي بيتحمد لي بالسلامه عادي مسموح له بالتعليق :)

همسه
(مسروقه)

مرت سنه صابر وعذري بالصبر
شماتت اصحاب الشوارب و اللحى
ومرت سنه واخاف لا يروح العمر
وانا انتظر و الشوق باقي ما انمحى


الثلاثاء، 8 مارس، 2011

رساله لحكام الخليج



ترددت في كتابة هذا الموضوع .. كنت اقول بداخلي لكل حاكم كتيبة من المستشارين الفطاحله فما حاجتهم لي انا ...

لكن للاسف الغالبيه العظمى من هذه الجحافل همها المال و الجاه و هم اكثر ناس يطبلون للحكام و يخلونهم يشعرون اننا من افضل بلاد العالم

ما راح انصدم لو سمعت واحد فيهم يقول لاحد حكامنا الشعب مو ناقصه شي غير الجنه و هذه بعد عندنا خطه ايمانيه تقربهم لها بأذن الله


رسالتي هذه و ان كان فرصة وصولها لحكامنا قد يكون اقرب للمستحيل

 .. لكن وجب علي كتابتها .. لانني احبهم و اعشق هذه الارض

فاعذروني على جرائتي اليوم

نحن لا نريد بدلاء عنهم عندي ايمان بان ال صباح و ال سعود و ال خليفة و ال نهيان بشكل خاص هم الافضل و من نريد ان يحكمنا

لكن كلامي هذا لا ينطبق على جزء من الشعب الخليجي .. لانه للاسف وزرائكم يا ابائنا و مستشارينكم يعيثون في الارض فسادا

وللاسف انهم يصورون لكم ما هو غير حقيقي

حالة الشعب الخليجي ما تسر ... مو الكل عنده المال اللي متخيلينه

فيه كثير تحت خط الفقر في اجزاء من الخليج و يعتبر عدد لا يستهان به
وجزء اخر ديكور بس ولكن من الداخل مديون و فقران

فيه ظلم في اغلب الخليج .. مستشارينكم يا من نحب جعلونا نكره ما نحن فيه

والله اني اخاف في يوم من الايام يحدث ما حدث في تونس و مصر

لاحد يقول لي انت تتخيل و نموت نموت و يحيا الزعيم ... لانه اذا زاد الظلم و الناس اصبحت جياع

ويشوفون فئه قليله من الحاشيه تمتلك كل الاموال التي هي من حق الشعوب وتبذر و تصرف بلا حساب
 و هنالك من المواطنين لا يملك قوت يومه و هنالك من المواطنين يحمل هم الدين


لانه اتبع احلام الغنى عندما راى زمرة من الفاسدين يبذرون بلا حسيب ولا رقيب و اراد ان يكون منهم

لكنهم قضوا عليه
راح تكون الثورة ضد الظلم هي الحل

للاسف اصبحنا نلجا للعنصريه... للطائفيه.. لكل ما يفرقنا ...فقط لناخذ حقوقنا

حكامنا ... اباءنا ... احبابنا

لا اكذبكم القول لو قلت لكم الانظمه الخليجيه في خطر كبير
وهلاكها قريب ان لم يحدث اي تغيير

خصوصا انه هنالك اطماع خارجيه ستسهل الانقلاب عليكم . والعياذ بالله من هذا اليوم

والله لا اتمنى ان ارى هذا اليوم .. كما لا اتمنى لاوطاننا الا الرقي و الحياه الكريمه لكل ابناء هذه الاوطان

نعم خائف .. نعم مرعوب من المستقبل

كما يوجد غيري اناس لم تعد تهتم لمن يحكمها .. تريد فقط العدل و ان يعيشوا بكرامه

حكامنا ... اباءنا ... احبابنا

نحن نحبكم و نعلن الولاء لكم

ارجوكم ابعدوا الزمرة الفاسده عنكم لتروا حقيقة ما يحصل .. لانه هنالك اجزاء تغلي من اوطاننا وبالفعل بدأت الناس تفكر بالتغيير

بل الكثير بدأ يعلنه


الله يستر بستره



ابنكم

فهد


اللهم احفظ الخليج و اهله من كل شر

الأربعاء، 16 فبراير، 2011

المنحه انقلبت الى محنه



للاسف الكتاب باين من عنوانه ما يحتاج شرح

و اعتقد الكثير منكم عرف شنو اقصد و اكيد اكثركم يتحلطم نفسي بخصوص

المنحه الاميريه التي انقلبت الى محنه تعاني منها الاسر الكويتيه

 بسبب الجشع المستوطن في نفوس تجارنا اللي يخسرون برا الديرة و يعوضون فينا

تخيلوا اليوم رايح اشتري موبايل شايفه امس في الغانم
 لقيته ارتفع ٢٧ دينار في يوم وليله

شنو هالمصيبه .... انا سمعت ناس تقول الاجهزه تزيد كل يوم لا يقل عن ٥ دنانير كل ما نقرب للمنحه

بس ما صدقت الا اليوم .... بالفعل صدموني

اللحين بيقولون لي البعض يا عمي جايه الف قفلت على ٢٧ دينار

ايه قفلت عليها لاني ما احب احد يستغفلني .... مستعد اشتري نفس الجهاز من الانترنت حتى لو كان بنفس اسعار الكويت

بس اهم شي فلوسي ما تروح للحراميه اللي ما يخافون الله

حتى المحاميد ابو طقه رافع اسعاره ١٠٠٪

والله مصخت ... لا و الموظف اللي بيوريكا شنو يقول لي ... اصل الشعب الكويتي اثبت انه بيدفع عادي عنده

لا يا بابا اللحين احنا بنقول كفااااااايه

شكله بنطلع في مظاهرات و نقول

الشعب يريد اسقاط الاسعار .... لاننا باختصار زهقنا و تعبنا من جشعكم

نريد شباب واعي ... نبي شباب الكويت يكون له كلمه لي متى و احنا سلبيين

نبي ننظم مقاطعه ولو ليوم واحد .... عشان يحسون اننا زهقنا و نقدر نستبدلهم .... عشان يعرفون اننا مو مغفلين

اليوم انتشر برودكاست بتنظيم مقاطعه بتاريخ ١٩ فبراير و بصراحه انا فرحت جدا بهذا التحرك

اي نعم في هذا التاريخ لن اشتري اي شيء منكم

ما راح يضرني اقعد يوم واحد من غير ما اشتري و ازيد ارصدتكم

اقدر على تاجيل الشراء يوم و يومين مو مهم

المهم ابي اوصل صوتي لهم

و اقول عفوا .... لست مغفلاً


اتمنى من الجميع المشاركه و نشر هذه الفكره نريد ان نثبت اننا نستحق ان لا نعامل كمغفلين

هذا واجب على كل واحد فينا


19-2
يوم الحريه من التجار

الأحد، 13 فبراير، 2011

هجره المدونين و البيان رقم ١٥٦٢





السلام عليكم

حيالله اخواني و اخواتي الاعزاء شعب المدونين المهاجر

تصدقون فقدت كثير منكم في الفترة الاخيره

وصرت افكر وين راحوا ... الى اين ذهبوا الاحرار

لين بالصدفه و انا اقرا قصه حب استكانه

اكتشفت انه المدونين صاروا مغردين و اغلبهم هاجروا لتويتر يغردون

و خبركم على قولة شانيل احنا دقه قديمه وصعب نتغير

لذلك تم اصدار هذا البيان الذي يحمل رقم ١٥٦٢

(( متاثر بالجيش المصري و اللي صار بمصر ))

نظرا للظروف الراهنه و المتطلبات الضروريه لتطور امتنا

تم اقرار ما يلي

يتم فتح حساب في تويتر و نغرد مع المغردين ( حشره مع الناس عيد )

و بما اني كويتي لازم اصير مع الهبه الجديده

و في نفس الوقت قررت القوات المسلحه الانترنتيه بالاستمرار بالتدوين في واحتي هذه

التي جعلتي اعرف الكثير من العقليات التي افخر بها و ان كنت اختلف مع بعضهم لكني احترم عقليتهم

لذلك على الاخوه المغردين اللي يعزون علي و اللي ما يعزون بعد

اتباعي في التغريد حتى اغرد بصوت اعلى

والله ولي التوفيق

ايه على فكره نسيت اقولكم هذا النك او الاكاونت ما ادري شنو تسمونه يا المغردين الافاضل
Dr_Fahed@


فاصل

الاغنيه هاذي صار لي يومين متحطم فيها و تعرفون اللحين بصير عيد الحب و العياذ بالله

فبالتالي يزيد مستوى الرومانسيه ... و انا يا خلاف وحداني و مسكين ( لا تخافون مو نغزات ما نستقبل مغازل ابد )


بس صج صج صج ,,,, انغام ابدعت بهذه الاغنيه .... باين عليها الاحساس في الاداء



الجمعة، 4 فبراير، 2011

ارحلوا و انقذوها



كفايه هنا نقولها لكم انتم و ليس للنظام

كفايه لقد حققتم اكثر مما كنتم تريدون في البدايه لكن الطمع اخذكم و للاسف اصبحتم لعبه لايادي خارجيه و داخليه دون ان تعلموا

حرام مصر بتتدمر بسبب عنادكم و تفكيركم بعواطفكم

ارجوكم رجاء حار فان قلبي والله يتقطع على مصر

الللي بيحصل

حرااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااام

كفايه عناد

كفايه دمار لمصر

كفايه اعطاء القوىالخارجيه فرصه لتنفيذ اجندتها

الان اقولها لكم ارحلواا انتم حتى تعيش مصر

ارحلوا من ميدان التحرير  حتى يعود الامن لمصر

ناذا تريدون ؟؟؟

حكومه و تم اقالتها

نائب و تم تعيينه

عدم التوريث و تم تحقيقه

عدم الترشيح لما اخرى و هذا ايضا تم

ماذا تريدون ؟؟؟؟ هل القضيه مجرد عناد

اصبروا 6 اشهر فقط

ليس من اجل النظام من اجلكم انتم

حتى تعرفوا من تختارون ليكون رئيس مصر القادم فان رئاسه مصر حمل كبير لن يستطيع ان يقوم به اي شخص

اصبروا حتى يتم نقل السلطه بشكل سلمي

اصبروا حتى لا يستغل اعداء مصر هذه الفرصه لوضع ازلامهم في النظام

حتى لا يستغلوها من اجل حرب اهليه او دمار لمصر و سرقه لخيراتها

ارجوكم يا شعب مصر يا شبااااب مصر

يا مثقين مصر يا عقلاء مصر

الان دوركم انقذوا مصر من الدمار

لكي تفهمون الوضع ابحثوا عن من الذي اخرج قياداته من السجن

ابحثوا عن من كان السبب الفعلي بخروج كل هذه الاعداد من المساجين

ابحثوا عن من تم تهريبهم لغزة و لبنان

عنا تعرفون المارد التستر ما بين جموعكم و هو يخطط لدماركم

اللهم احفظ مصر من كل شر

اللهم اهدي شبابها لما هو فيه خيرها و خير الامه

:'(



الأربعاء، 19 يناير، 2011

ابيض او اسود





كانوا يقولون لنا قبل

يا ابيض يا اسود ما عندنا رمادي لازم تقرر

دايما نفكر انه يا خير يا شر اما تكون ناجح او فاشل

لازم يا الرجل تكون قوي او ضعيف و انتي بعد يا تكونين طيبة و حبيبه ولا لاااا نسرة و ما تتعاشرين ابد و النوعيه الثانيه يا كثرها :)

لكن هالكلام صحيح ولا لا هذا الكلام اللي كنا نقنع فيه انفسنا من عمر

لما تجيك الوالده تقول ادرس خلك شاطر مو تسقط. يعني ما فيه شخص مو شاطر بس ما يسقط

مافيه وحده طيبه و حبيبه بس مع ناس تكون نسره بمعنى الكلمه

مافيه رجل قوي على الناس و عند ناس نعامه

طبعا كلكم بتقولون اكيد فيه و فيه و اصابعك مو سوى و الخرابيط هاذي

ليش خرابيط انا اقولكم ...... خرابيط لاننا ما نؤمن فيها لاننا ساعات متناقضين

ساعه نقول الله خلق و فرق و محد كامل بهالدنيا و ساعه لاااا انا شلون غلطت الغلطه التافهه هاذي

ولا فلان شلون يتجرا و يسوي جذيه او ليش انا ما اكون ناجح مثل ترامب ولا بيل غيتس انا شخص فاشل

يعني احنا في لحظه نقر انه لا كامل سوى وجه الله سبحانه و تعالى

و في لحظه اخرى ما نرضى سواء من انفسنا او من غيرنا الا الكمال

زين ليش ؟؟ الدنيا مو ابيض و اسود مثل ما كانوا يقولون لنا

لا الدنيا فيها رمادي لا و الله ما كثر هذا اللون في هالدنيا

يمكن اكون انجح خلق الله في الطب لكني فاشل في الاداره

يمكن تكون اقوى رياضي لكن ما تحب شي اسمه دراسه

كل هذا طبعا جاني و انا اشوف التلفزيون كان فيه حوار بالفيلم البطل يعزي شخص يقول له ترى ما فيه ابيض او اسود

انت انسان مليان عيوب ولكن عندك الكثير من المميزات. و يمكن اهم ميزه بالنسبه لي انه عرف انه عنده عيوب

احنا بعد لازم نستوعب انه مافيه ابيض او اسود

نحاول قدر الامكان ان نتلافى عيوبنا و نقوي من مميزاتنا شيء صحيح

لكن لنتذكر اننا مخلوقين و لن نكون كاملين مهما كان

اطمح للتميز لكن لا تدع طريقك للنجاح يكون هو نفسه سبب هلاكك

و احلى سلام للعالم الرمادي :)

الأحد، 9 يناير، 2011

يمنون علينا بزبالتهم



عنوان غريب صح لكن تراه مو نفس المانشيات اللي في الجرايد هو في صوب و الموضوع في صوب

لا

هنا و لاول مرة اكتب خلاصه الموضوع كعنوان

هنالك تنبيه في الاول عندما تقرأ كلمة زباله او قمامه حط بعدها على طول في بالك تكرمون و يكرم كل من يقرأ هذا البوست

شي طبيعي و ممكن يكون متوقع لما اطلب منك سلف و تتعذر لي و تقول الراتب و العيال و الازمه الاقتصاديه
و ترا الحال من بعضه و اذا لقيت من يسلفك بلغني ابي اتسلف معاك

شي طبيعي لما تقول لشخص ابي سيارتك اليوم عندي كم مشوار و سيارتي خربانه يقول لك اووووووف ما لقيت الا اليوم عاد اليوم هذا بالذات انا حدي مشغول مع الوالده و الاهل
و ابو الشباب ما عندة الا القهوه حق هالشيشه

بس تتوقعون لما تقولون لشخص نبي نشيل زبالتك يقول لا والله ما ينفع
و ممكن تدخل امن الدوله بتهمة تهريب الزباله الوطنيه

لدول محور الشر الذي سوف يدرس طبيعه الشعب الكويتي و طرق هزيمته من خلالها

عادي مو فيه كتب عنوانها قل لي ماذا تاكل اقل لك من انت و السوالف هاذي
عاد يقول لك حتى الموساد عنده نفس هالطرق
بس اقوى محد يتخيلها
يقول قل لي ما هي زبالته اقل لك من هو

طبعا انا شطحت يمينا و شمالا

نرجع الان بعد هذه المقدمة الطويله اقول لكم قصتي الحزينه مع القمامه
ـ الله من زين السالفه دام اولها زباله ـ


المهم يا اخوان و يا خواتنا الطيبين و الحلوين
عندنا دكتوره جزاها الله خير من منطلق حبها لهذه الارض و من منطلق ايمانها بان كل فرد في المجتمع له دور يجب ان يؤديه حتى نطور من بلدنا الحبيب و نرجع له و لو القليل من ما قدمه لنا

جتها فكره بسيطه بانه ليش ما نقوم باعاده تصنيع مخلفاتنا يعني إعاده التدوير

خصوصا انه فيه شركات كثيره توفر لنا الحاويات المخصصه لهذا الغرض بالمجان
و بهذه الحركه استفدنا بانه قللنا مخلفاتنا اللي تدفن في ارض الكويت و تسبب التسمم لها
و وفرنا على البلديه حمل هذه الاطنان من القمامه و ايجاد طرق للتخلص منها

فكر جميل جدا و شدني بشكل كبير حتى صرت رئيس رابطه مشجعين الدكتورة

بس السالفه مو تشجيع و تصفيق لا
لازم اقوم بدور ايجابي اكثر لاني احب هذه الارض مثل دكتورتنا العزيزه
و انا اناني ما ابي الفضل كله يعود لها و تاخذ أجر بروحها
عشان جذيه قررت اقط وجهي باختصار شديد و اشارك بدور اكثر ايجابيه


لكن و اعوذ بالله من كلمه لكن
هذه الكويت صلي على النبي
تم اغراقها بالبيروقراطيه ـ كلمه توني متعلمها و ودي استخدمها ـ و الروتين اللي اقل شي ينقال عنه احتراما للذوق العام انه بايخ

لما الموضوع صار عند سعادة المسئول

و تمت مقابلته بعد عناء طويل لانه الله يعطيه العافيه مشغول بعدة امور
و ترا هنيه انا ما اتنطز من صجي متوهق فينا و كثر طلايبنا
_ بدا يضبط مع المسئول من اللحين _

طبعا بقولكم الان الحوار اللي تم و انتم تحكمون

كان اول سؤال بعد ما شرحت القصه كلها

انت شكو بهالسالفه ؟!

حضرتي :)
والله دكتورة عندنا طرحت الفكرة و عجبتني حيل و قلت لازم نطبقها و نشجعها


امممم سؤال الشركه هاذي حق واحد يصير لك ( يعني من اقربائك )

هنيه انا بلمت بصراحه
قلت لا والله مو حق واحد يصير لي

قال لا عادي حتى لو كانت حق واحد يصير لك قول انتم تقدمون خدمه من اجل الكويت
ـ الحمد الله انه يؤمن انها خدمه مشرفه من اجل الكويت تقدم جميل جميل جدااا ـ


لا والله دكتور مو حق احد يصير لي و بالعكس لي الشرف انه شخص يصير لي يقدم مثل هذه الخدمه المشرفه من اجل الكويت

زين ليش ما تقدمها للوزاره و تطبقونها على الكويت كلها
ـ هذا مركز واحد قعدت ثلاث اسابيع زين لو الكويت كلها كم بقعد خمس سنوات ـ

حضرتي :)
اسمحلي دكتور انا شخص اناني و ابي مركزي يكون اول مركز بالكويت يطبق هذه الفكره


قال اممممم سوف يتم دراسه الموضوع و مدى قانونيته و نرد لك خبر و طبعا هذا وجه الضيف من يومها


طبعا خل امدح في المسئول شوي لا ينكتب فيني تقرير شديد اللهجه و يحطوني في مركز طبي على الحدود

لا عاد جد ممكن اوقف معاه بانه فيه الكثير يحاولون يسرقون او يفيدون نفسهم عن طريق استغلالهم للوظيفه الحكوميه

ممكن اعذره انه ما يعرفني شخصا

ممكن اعذره انه يخاف من المسئول اللي فوقه يسوي له فيلم و يساله نفس اسالته لي
و يتهمه انه من سراق المال العام
و سراق الزباله العامه

ولكن
_هنا ما راح اتعوذ من كلمه ولكن مثل اللي في البدايه لانه موقعها هنا هو الاصلح_


المفروض رؤيه المشروع وليس الاشخاص

المفروض رؤيه الفائده للكويت وللبيئه و ايضا للوزارة اللي راح يتم تصريف زبالتها ببلاش
و للبلديه اللي ما راح تتوهق في هذه الاطنان من الزباله بكيفيه نقلها و طرق التخلص منها


قد يكون عند المسئؤل اسباب لا اعرفها تخليه يتخذ هذا الموقف

ولكن اللي اعرفه انه الكويت تستاهل منا كل جهد ممكن يجعلها اجمل و افضل



نحن مستعدون للتطوع من اجل بلدنا لاننا نحبها

و نتمنى منكم ان تسمحوا لنا بذلك

اللهم احفظ الكويت و اهلها من كل شر