الأربعاء، 28 أبريل 2010

مهزله بحق الكويت






ظاهره للاسف بدات تنتشر في جرايد الكويت بشكل كبير

المشكله مو في سالفه انه يطلب الفلوس ( الشحاذه ) لانه يمكن صج محتاج وان كنت استغرب من توفر المال من اجل الاعلانات

لكن الله العالم باحوال البشر

بس من باب اولى انه يطلب من شيوخه , من ديرته , من حكومته

صحيح الخليج كله اخوان وشيوخه يستاهلون كل خير و فيهم الكرم والنعم فيهم

بس مهما كان هذه عيبه بحق الكويت حكومه و شعب

ترى معناها كبير

ليش ماعندنا شيوخ ؟!!!!

مافي حكومه ؟؟

هذه يضرب في هيبه الشيوخ و الاسره الحاكمه بعد ما تم ضرب الحكومه

وبالتالي ضرب اكبر في هيبتنا كدوله

انا اعتبر هذه الاعلانات اهانه للكويت

لو كانت لاحد كبار الاسره تهون

لو كانت لوزير تمشي

نائب نبلعها

على الاقل كويتي منا و فينا و(( يعتبر )) من رجالات الدوله

اتمنى للاسره الحاكمه ان تنتبه على هيبتها ترا صج كفايه

كفايه مهازل بحق الكويت

اللهم احفظ الكويت واهلها من كل شر

الثلاثاء، 27 أبريل 2010

لا " يخصخصونا "

اليوم البوست بخليه خفيف شوي
ربنا يخفف كلمنا عليهم
خوفي بس لا " يخصخصونا "
أهداء لكل فاسد بثوب الشريف

الجمعة، 23 أبريل 2010

انا اتطمش اذا انا موجود


عادة زادت في الفتره الاخيره بشكل مزعج

والطماشه لغير متحدثين باللهجه الكويتيه هي الفضول الزائد عن اللزوم المصحوب بالفراغ الذي يجعل الشخص يتنح تتنيحه قصوى لمعرفة ملابسات القضيه _ اقعد على اللغه اللي عندي مو طبيعيه _

انت في خط سريع فجأة يوقف الشارع و زحمه مو طبيعيه

تقول لا إله إلا الله شكله حادث الله يستر

الله يصبر اهلهم و يشفيه اذا كان حي و يرحمه اذا كان ميت

شوي تمشي ولا المفاجأه

الحادث مو في شارعنا

الحادث في الشارع المقابل

كل هذه لقافه (( الفضول ))

يرحم والدينكم وين وصلت اللقافه فيكم ؟!! زحمه عشان حادث في الشارع المقابل

عاد تصدقون الشارع اللي فيه الحادث كان ماشي اكثر من الشارع اللي احنا فيه لا و احنا في خط سريع

المفروض يعني خط سريع

زين انا ابي افهم انت دكتور بتنقذهم ؟!!!

شرطي بتنظم السير ؟!!

اطفائي بتساعد بفتح هالابواب او اطفاء اي حريق ؟!!

ولا بس عشان لما تروح الدوانيه او تروحين للبنات تقولون اعوذ بالله شفنا حاااادث الله يستر

لا والله اعوذ بالله من لقافتكم انتم

انا في هذا الوضع تشوفني انا اللي شغال بالهرن دييييييييييييييييييييييييييييييييييييييد

_ وقفة اعلانيه _
_الهرن هو الكلكس باللهجه المصريه و البوري باللهجه السعوديه :) _
_ اشدعوى احد منهم قاعد يقرأ لي _

حسوا افهموا خل عندكم احساس الناس وراها اشغال وانتم موقفين الشارع بلاغة شف و فضول مالله داعي

لا وانتم السبب في انه هذه الشخص ممكن يموت او الزحمه تطول

طبعا انا هنا اكلم الملاقيف طبعا

يعني انا عارف ان الديره مليانه ملاقيف و صحيح ساعات اصير منهم

بس بحدود والله

مو طماشه على الحوادث ولا ما تشوف واحد معاه لابتوب إلا عينك فيه

والمشكله لاب توبك قدامك ولا قاعد تطالع فيه

ترا عشان هذولا انا شريت privacy screen

عشان محد يبطط عيونه وهو قاعد جمبك يطالع في تيلفونك

لا والمصيبه لما يكون رجال كبير وتحس فيه يطالع من طرف عينه يمووووت ويعرف انت شنو قاعد تكتب

نفس واحد من الربع عليه عين ماشالله عليه يعرف منو داق علي قبل ما انا اشوفه

لا صج اللقافه زادت في الديره ليش ؟؟

لو هي على التيلفونات و اللابتوبات عادي تهون

بس مو في ارواح الناس و الحوادث ولا في سيرة خلق الله

عاد هذه الاخيره حدث ولا حرج

يا حب بعض الناس للتتبع عورات البشر

وهذا اعرف خرابيطه كذا و كذا و كذا و المشكله الولد مسكين مو مسوي شي بس سمعه

والبنت هاذي مااا تستحي امس شفتها تاكل ايس كريييم

يااااا الله اقيموا عليها الحد

انت يا طويل الشنبات وانتي يا صاحبة المقام الرفيع شكووووو بخلق الله

اللي موقتين فلان في الجامعه ولا فلانه بالدوام متى يجون و تدورون على كل تفاصيل حياتهم

كل هذا لقافه

ترى ما يجوز استحوا يا ناس والله انت شكو بسيرة خلق الله خلك في نفسك

واغلبهم اذا مو كلهم ينطبق عليه المثل

عبوبي لا اراها و عيوب الناس اجري وراها

يعني حاولوا بس محاوله على الاقل انكم تخففون مستوى اللقافه عندكم

واذا وقفتوا تتطمشون على حادث و سمعتوا وراكم ذاااك الصووووت

دييييييييييييييييييييييييييييييييد

تراه هذا انا

وادعوا جميع المتضررين من طائفة الملاقيف ان ينظموا لي في حملة انقاذ الشوارع من الملاقيف

وذلك بجعل صوت السياره يعبر عنك و عن طفاشتك من لقافتهم

الجمعة، 9 أبريل 2010

الطائفيه و العنصريه


الطائفيه و العنصريه انتشرت للاسف بالمجتمع بشكل قبيح جدا

للاسف صار الواحد يعامل اللي قدامه مو على اخلاقه و طريقه تعامله معاه


لا هاذي موضه قديمه خلاص


اللحين انت وين ساكن ؟ ولد منو ؟ ما هو مذهبك ؟ توجهك السياسي لو سمحت ؟؟ و لو ما فيها كلافه عليك مره وحده
النادي اللي تشجعه


يمكن بعد هذا ما يكون على هواي


زين انت شكوووو و هذا كله شكو


اللي اعرفه و ربوني اهلي عليه اني اعامل الناس لاحترامي لنفسي بالمرتبه الاولى و من ثم طريقه تعامله معاي

يعني شنو الفايده من ولد عمي ولا ولد طائفتي ولا ولد منطقتي لا ويشجع ناديي و اخر شي ما يسوى بيزه


الاساس في التعامل شنو ؟؟


شخصيه اللي امامك ولا السيرة الذاتيه


يا ناس اعقلوا فكروا لا تصيرون مسيرين ناس تمشيكم على كيفهم


ترى المدافع الاكبر عن الطائفه و القبلي ابن القبيله و ولد بطنها و الوطني و باقي التصنيفات اللي نازله السوق


ترا ما همه انت ولا اهلك


المهم الكرسي الحلو و النفوذ الطيب


لان في ناس غبيه صج اسلوبها بالحياه بان تجعل الكل يكره الكل و يحبني انا


وبالتالي يكون هو المحبوب و الناس كلها كخه مو حلوين يع


بابا اكبر شوي


بس الشرهه مو عليك على اللي يتبعك من هالمدمغين ما يدرون وين الله حاطهم


ترا شي يبط الجبد صج


يعني طبيب كويتي الكل يشهد له ما يترقى لانه مو من نفس الطائفه


ولا ضابط قدير يفيد البلد بس مو من قبيلتنا


او مهندس بس مو من عيالنا


للاسف البلد تخسر الكفاءات بسبب هذا التعنصر


(( لكم دينكم و لي دين ))


اقروا هذه الايه عدل


وانتم كل واحد مو من مذهبك خلاص اسوء خلق الله


يبه .. الله اللي بيحاسبه على عقيدته ولا انت


اللي اعرفه الله بيحاسب كل واحد على ما يؤمن به و يعمل به


مو يحاسب على ما يعمل به الاخرون


انت لك تنصحه و بس


سمع كلامك كيفه هو اللي اختار وخلاص


بس غصب يا انا صح يا انت عدو


دام اللي قدامي ما يتعرض لــعقيدتي ولا يجرح فيني


ما اعتقد في سبب يخليني اكرهه لهذه الدرجه


(( ان اكرمكم عند الله اتقاكم ))


يعني ترا ما فرقت انت ولد منو ولا وين ساكن ولا توجهك السياسي


يعني ما يحتاج الكره الاعمى هذا


والمشكله انه اغلب اللي يكرهون و يقولون الفلانيين فيهم و فيهم


تللاقيه عمره ما عاشرهم ولا يعرف عن طبايعهم شي


زين على اي اساس تقول هالكلام


(( اقربكم مني يوم القيامه احسنكم خلاقا ))


لذلك اعملوا باخلاقكم


طبعا هنا انا اوجه كلامي للعقلاء او من بقي فيهم عقل


اما اللي يتبعون الخفافيش من غير لا تفكير ولا عقل هذولا ما فيهم طب خلاص

انا مالي شغل شنو تفكيرك وايمانك فهذا قرارك و انت اللي سوف تحاسب عليه


سواء في الدنيا ام الاخره


ولكن اللي انا اطالب فيه واتمناه انى نعيش باخوه مثل قبل و اهلنا اول


لا فرق بينا بسبب اصل او مذهب


الفرق الاساسي هو بالعمل و الكفاءه حتى نرقى بالوطن


ويرقى بنا الوطن


اذا اخطأت بشيء اتمنى تنوروني و تبينوني لي خطئي


وان كانت رؤيتي صحيحه اتمنى منكم ان تساندوني


لان نكون بدل الاغلبيه الصامته


إلى الاغلبيه الفعاله التي تحمي بلدنا



اللهم احفظ الكويت و اهلها من كل شر و سائر بلاد المسلمين