ليت الزمن يرجع و ننعم في بساطتنا

 

ساعات اتمنى لو عندي جهاز مثل الريموت كنترول للزمن

 اعيد لحظات في عمري و اشغلها على البطيء

و بعضها والله ودي وقف عليها من حلاوتها

و اخر شي ارجع طفل

اكبر همومي لعبه و شلون اصرف الدينار اللي عندي

_هذا لما اكون غني_

تلاقيني اتهاوش مع صاحبي و طق و سب و اللي يشوفنا يقول يا ذابح يا مذبوح و بعدها ثاني يوم

اكون معاه كانه ما حصل شي ابد لا و اذا كان متهاوش تلاقيني اطب معاه

كان المضحك انه الكل ربعك يعني فجاه اخلص من لعبه في مدينه الترفيهيه ايام عزها

وارجل للوالد و اقوله صديقي فلان .. وطبعا فلان هذا تعرفت عليه قبل دقيقه ونص

العلاقات بسيطه الحياه بسيطه

شخص ما تحبه تقولهاعلى طول مافيه نفاق و اللي تعزه تعطيه عيونك

عالم جميل جدا .... تعرفون ليش

لانه عالم بسيط ... خالي من التعقيدات اللي احنا صنعناها لانفسنا

كنا مو فاضين نحط العقد و الحواجز قدام انفسنا

كان هدفنا نستمتع باللحظه .... ما نفكر في بكره و همومه ... ولا امس و احزانه

الاجمل هو الصدق .... لما كنت صغير ايام الغزو العراقي الغاشم فجاه الوالده تدورني ولا تلاقيني قاعد في زاويه ابكي و ادعي ربي

يا رب احم الكويت وردنا لها يا ربي احمي كل الكويتيين

كانت دعوه باخلاص و صدق و محبه

ودموعي تارسه وجهي وعاد اسمع صوت التنهيد و سحبت النفس شلون من قلب

... ما فكرت وقلت يا رب تحمي بس الفلاني و العلاني اما هذولاك لااا الله ياخذهم

مثل اللي حاصل الان من تقسيم غبي يفرق حتي بين الاخ و اخوه

وكل واحد يتصيد على الثاني

اتمنى نتعلم من الاطفال شلون يكون كل واحد فينا انسان بمعنى الكلمه

في الشهر اللي فات كنت اشتغل في عيادات الاطفال

تعلمت اشياء ما توقعت اتعلمها بهذا المكان وخصوصا من الاطفال

مثل ما قلت حق صاحبي قبل كم يوم

تعلمت اساسيات العلاقات الانسانيه

كلمه معقده شوي .. ادري .. بس لازم يعني دكتور و فيلسوف لازم اتفلسف عليكم شوي تحملوني

لو تسال كل شخص شنو يبي ؟

يمكن يقولك الف شي و شي

لكن الصج هو او هي بس يبون يشعرون بالامان ، بالثقه في الشخص اللي قدامه ، بالراحه

و ترا كل الطلبات الثانيه مجرد امور ثانويه اذا هذا ما تحقق انت او انتي ما سويتوا شي ابدا

لكن لو تحقق يا سلام

بقولكم حادثتين حصلت بعيادات الاطفال خلتني افكر بهذا الشي و استنتجه

اول حادثه

 جاني ولد عمره ٧ سنوات

طبعا كان تعاملي حلو معاه

و مافيه تخدير موضعي قبل الابره الا وحطيته و احلى واحد يشتت انتباهه عشان ما يشوف الابره و معطيها على احلا مكان

بس الولد جنني على ما خلصت علاجه ... ليش ؟!! لاني اهتميت بالحاله من ناحيه الطبيه و نسيت النفسيه

صحيح عضويا ما كان يحس بالم ابدا لكنه كان باختصار خايف

خصوصا بيني و بينكم شكلنا على الماسك و لبس الفضاء مالنا .. تقول بنسوي فيه تجارب مو نعالجه

المهم

 في الحادثه الثانيه فيه بنت جتني عمرها ٨ سنوات _ الله حفظها _

لا تشوفوني لما دخلت هلا والله ... منو هالحلوه اللي دخلت .. مدحت فيها بشكل مو طبيعي

و تصدقين اسمك نفس اسم اختي الصغيره ..

ما شاء الله الملابس هذه من وين شارينا بجيب نفسها ...

 حسستها اني بالفعل اعزها و شعرت اني قريب

مو الدكتور ابو ابره اللي يخرع و ما يحبنا بس يبي يعورنا

تخيلوا تسالني بعدها شنو بتسوي اقولها و انا اضحك مالك شغل ..

 كيفي  بسوي اللي ابيه هذه الاسنان حقي مو حقك لا و تفغص في خدودها و مجننها شوي

لكن كل شي عدا على خير بدون صياح ولا شي بالعكس لما خلصت كل شوي داشه العياده تسلم و تلعب و تقول ما ابي احد يعالجني الا هذا

السؤال ليش ؟. هل لاني احسن دكتور في العالم ؟ يمكن :) بس لا مو هذا السبب

الاخصائي الموجود احسن مني مليون مره ... لكنها شعرت بالامان و الثقة

هذا ما نحتاجه في حياتنا ان نشعر بالامان و الثقه في بعضنا

اقولها مره ثانيه خلونا نتعلم من الاطفال من الزمن الجميل

للاسف ناخذ عمرنا كله عشان نتعلم شلون نعيش افضل  ونغير بطرق حياتنا و تعاملنا مع البشر

لكن بالنهايه نكتشف انه و احنا صغار كان عندنا سر الحياه السعيده

نقضي كل عمرنا حتى نصل لنفس النقطه اللي ابتدينا فيها

طبعا هذا المحظوظ منا

 

اغنيه البوست

على طاري هذا الموضوع اهدي لكم اغنيه

عيال حارتنا ... لعلي بن محمد

ياليت ان الزمن يرجع ورى ولا الليالي تدور
ويرجع وقتنا الأول وننعم في بساطتنا

امواج الموت و المتعه

بوست اليوم بيكون مع حادثة الغرق الوشيك اللي كاد ان يحصل لي في الامارات و الله ستر

مثل ما وعدتكم البوست اللي فات ..

والان لكم قصتي مع الامواج

...........

في سفرتي الاخيره لدبي من ضمن خططي كان تغيير الفنادق كل يومين عشان يكمل هدف تغيير الروتين

و حجزت في فندق على شاطيء الجميرا .. اول ما دخلت الغرفة .. كانت بالدور السادس عشر

فتحت البلكونه ولا المنظر ما شاء الله ... البحر العجيب و صوت الموج رائع و الهوا طيب ما شاء الله

كان شكل البحر يقولك انت غلطان لو ما جيت تسبح اللحين

انا ما صدقت خبر و على طول بدل و انزل

شفت حمام السباحه قلت يالله يا ولد يا شاطر صار لك فتره ما سبحت بحمام السباحه خلني اسخن فيه قبل البحر

نزلت حمام السباحه و تعرفون لازم شويه برستيج نزل النظاره على الكرسي و حط فوطتك و عطها كم حركه كانك فاهم السالفه و تسخن

لانك سباح اولمبي ما شاء الله و حاصل على عشر تعش ميداليه الماسيه

عاد انا فيني طبع خايس تتوقعون انزل اسبح على المزاج و استمتع بالماي

لا لايمكن لازم اعدي حمام السباحه اما غوص نفس واحد مسوي نفسي دلفين

ولا سباحه حره لكن لازم اسرع شي

ما ادري قاعد اسابق احد ولا حاط في باللي بيعطوني نقاط ولا جائزه

المهم بعد ما تعبت نفسي شوي و قاعد اسمع صوت البحر يناديني بكل شوق و لهفة

قمت اخذت الفوطه و لابس النظاره تقول بتمشى على شواطئ ميامي

لا تشوفون الموج وقتها مو طبيعي ... اجراااام

تشوفون الناس اللي على الشاطيء

اللي يسوي قلعة رمليه

 و اللي يتشمس مو عاجبهم البياض اللي فيه يخرب بيتهم.. حقدت عليهم شوي عادي

ولا اللي داخل البحر و مستمتعين بالموج و الاحلى اللي على الالواح يركبون الموج

قلت ما يبيلها عاد ....

ها انا ات لك يا بحر الخليج احتضنك بشوق

كان الماي عجييييييييييب فيه بروده خفيفه خصوصا مع كل موجه جديده اخترقها

كنت اصد الموج و انا واقف .. الماي كان واصل تقريبا لحد ركبي

قلت ادخل اكثر.. و مع متعة الموج ادخل بعد و ادخل بعد

وقتها قلت لا لازم اتسبح ضد الموج خل استانس

ما ادري يمكن خمس ثواني تسبحت بس

و وقفت اطالع وراي و لا الشاطيء بعييييييييد

و احلى واحد يبلع ريقه .... ادري اني اعرف اتسبح بس مو خمس ثواني ابعد اكثر من خمس مائه متر

قلت ما يبيلها عاد ارجع

قمت اسبح ...

اسبح ...

اسبح....

احس اني ما اتحرك الا اربع امتار ... هذا اذا تحركت اصلا

حسيت بالعضلات بدت تفتر خصوصا انتي شديت عليها في حمام السباحه

قلت لا لازم اسبح بقوه عشان اوصل لانه اذا قعد شوي اكيد بغرق

قمت اسبح بقوه لكن المصيبه

اني اتقدم مع الموج لك لما يرجع الموج يسحبني اكثر و مهما حركت رجولي او ايدي ما ينفع

و بعد كم مره ابي اخذ النسم ولا بدال ما اتنفس هوا

يضربني الموج ويمنعني من التنفس

شعور الله لا يوريكم اياه و لا يمر علي غالي

بعد ما شديت حيل على نفسي رجلي لمست الارض

اخيرا

على طول طبعا ثبتها في الارض

لكن كان البحر يقول هيهات

الموج سحبني مره ثانيه لداخل البحر

في لحظه صرت اطالع الناس على الشاطي ... محد منتبه لي .. و ولا احد دراى عني

مافي منقذين ...

انا اصلا بروحي ...

و حتى اللي على الشاطيء مو منتبهين انه فيه بني ادام قاعد يصارع الامواج بس عشان يتنفس و يوصل

في لحظه فكرت انادي باعلى صوتي يمكن احد يقدر ينقذني

بس ما ادري يمكن عنجهيه فيني و لا كبر

ما كنت ابيهم يشوفوني في لحظة ضعف

مو وقته تطلع عنجهية العرب البايخه هاذي صح

فقمت شديت حييييل على نفسي و اسبح مع كل موجه .. استخدم قوتها لمساعدتي و دفعي للامام  و لما المس الارض برجلي

قبل ما تسحبني الموجه للبحر اثبتها بكامل قوتي في الارض

صحيح تسحبني بس على الاقل تسحبني متر ولا تسحبني اربع امتار

قعدت اسوي هذه الحركه لين ما الماي وصل تقريبا لركبي

طبعا هذا بكون مستوى الماي لو وقفت

لكن في ذاك الوقت ما كنت اقدر اوقف على رجلي

تخيل انه كل عضلاتك استهلكوا اكثر من طاقتهم

كنت انتظر قوة الموج توصلني اول الشاطئ

تخيلوا كاني قاعد و انتظر كل موجه ترسلني للشاطئ

حتى كان فيه ولد يمكن عمره سبع سنوات يطالعني باستغراب

 شفيه هذا يستهبل ليش ما يوقف

قعدت شوي و الحمد الله وصلت الشاطئ

طبعا مو مستوعب اللي صار لي

ثواني بس كانت تفصلني عن الغرق و الموت

و هي ثواني بس اللي وصلتني لهذه المرحله

و جتني نفس العنجهيه .. استجمعت كل قوتي عشان اوقف و اروح اقعد عند اغراضي و كانه ما حصل لي شي

كاني ما كان يفصلني عن الغرق و الموت يمكن خمس ثواني

شكرت ربي على نعمتة ... لانه اكيد اكيد اكيد مو قوتي و لا سباحتي اللي طلعتني من هالبحر لاني قعدت لحضات فيه بكل قوتي

ما قدرت اتغلب عليه

لكن انا عندي ايمان ان الله بعث لي ملك هو اللي ساعدني و قربني للارض

اللهم لك الحمد على نعمتك ...

دتعلمت شي من هذه الحادثه .. كلمة اسمعها و لا كنت ماخذها في البال صحيح البحر غدار

لكن الاكبر هو انه البحر هو الدنيا

احنا كل يوم نصارع امواج من المصاعب و الهموم في حياتنا

والحل في حياتنا هو نفسه الحل و الاستراتيجيه اللي انقذتني بعد الله من البحر

الايمان بالله و ان كنت في لحظات فقدت الثقة بعودتي لكن لم افقد الثقة بالله

ثانيا انه كنت استخدم كل موجه و قوتها بمساعدتي للوصول لبر الامان و قبل ان تسحب الموجه للبحر كنت اثبت قدمي في الارض

حتى لا اسمح لها بسحبي و بعيدا عن هدفي .. و كررت هذه التقنيه حتى وصلت

و هذه الحياه .. يجب ان نستخدم قوتها و كل موجه حتى نصل لاهدافنا و قبل ان تسوء الامور

 نثبت انفسنا حتى نتجاوز هذه الفتره ثم نركب ثاني موجه باتجاه هدفنا

في هذه اللحظات صج تشعر بقيمة كل ثانيه في حياتك

صحيح انه الثانيه الوحده تفرق كثير في حياة الناس

اكتشفت ان الدقيقة جدا طويله

60 ثانيه ... احد بيحس بقيمتهم ؟!!!

حط راسك تحت الماي و اكتم النفس لمده 60 ثانيه و خل عينك على الساعه

راح تحس انها مو راضيه تمشي

تدرون شنو الشيء اللي اثبت اني بالفعل مجنون ..

 مو اني رجعت البيت بعدها ريحت شوي و كملت يومي كانه ما حصل لي شي لا

الجنون كان انه بعدها بيومين رحت لنفس المكان رحت للبحر .. اواجه الامواج مرة ثانيه

لا تقولون شفيه هذا فصل ما تعلم من المرة الاولى

صحيح يمكن اكون مجنون اني رحت اسبح مره ثانيه لكن في هذه المره كنت اعرف حدودي

و اعرف شنو الشي اللي احرص اني اسويه واللي ما اسويه عشان ما اطيح بنفس المشكله

و لله الحمد كانت امواج رائعه و السباحه فيها قمة المتعه

استمتعت ولكن لم انسى غدرها ... و بنفس الوقت ما خليت الخوف و هذه التجربه السيئه توقف في وجه استمتاعي بالامواج

هذا هو انا ... قد اكون مجنون لكني حذر بنفس الوقت ... شلون .. ما ادري

اهم شيء الاستمتاع بالحياة و التعلم من كل موقف يحصل لك فيها