الجمعة، 10 ديسمبر 2010

هدية عيد ميلادي




يوم 6 ديسمبر كان ذكرى مولدي

و في ليلتها الكويت ولله الحمد حققت كاس الخليج العربي

و الفرحه عمت الكويت كلها

و من قدي الكويت كلها تحتفل بعيد ميلادي

و اعتبرت انها من اجمل هدايا عيد الميلاد و اكبرها

لكن اكتشفت اني غالي حيل عند حكومتنا المجيدة

و قررت الحكومة تهديني هدية اكبر
و هذا العشم فيها هاذي حكومة كلها خير و كرم و محبة للمواطن الكويتي
و ما يطلع منها الا كل خير و حب و سلام

الحكومة - جزاها الله بما عملت - حست اني انزعجت يوم الاربعاء فحبت تسوي لي شو show
قامت الله يخليها لعين ترجيها بلعب ( الاستغماء )
و الشرطه تلحق المواطنين و اللي يدخل بيت النائب الحربش هو الفايز
و اللي يمسكونه اول ينطق
طبعا غشمرة مو صج لان الحكومة تحبنا حييييييل
وان كان الشرطه بعد يا حليلهم مطيحين الميانه شوي
و استانسوا على اللعبة و تحمسوا و كسروا ايد كم واحد على كم ارتجاج في المخ
و هنيه طبعا الغلط مو على الشرطه ابداااا
المواطنين و النواب طلعوا مو مال غشمرة يزعلون بسرعه الله يهديهم
يعني واحد يلعب معاك شنو المشكله لما يغسل شراعك و يكسر ايدك خل روحك رياضيه
يا باشا لا تصير جاهل
- ولا اقولك صير جاهل احسن يمكن ما يصير فيك اللي صار و يمكن تنعز بعد -

يا حليلها الحكومة تونس ما شالله عليها
حتى يقولك الشرطه حبت اللعبه و حدهم استانسوا عليها
عشان جذيه بيكثرون لعب مع المواطنين
تعرفون الديرة صايرة زهقه و الحكومة ما تحب تخلي على المواطنين قاصر ابد
فلازم عليها انها تونسهم بهالالعاب و شويه علاج طبيعي بالتدليك العنيف في منتجعات وزارة الداخليه
و بنفس الوقت لازم تعلم هاللي يزعلون انه السالفه ما تستاهل
و خل جلدهم يتعلم على الطق عشان يطلعون رجال
و لا قدر الله لو صارت حرب و غزو الكويت لا قدر الله
يكون الشعب متعود على الطق و الاهانه من اللحين

ما شالله عليهم الحكومه ما خلت شي ابد
لازم تخطط لتنميه الانسان الكويتي
وتحسب حساب كل شي

بعد هذا كله احد يلومني لما احب الحكومه حبا جما لدرجه العشق و الهيام

حتى بتهديني كم هديه طيبة مثل الغاء كم مادة من الدستور و عدم العمل فيها
وتطبيق القانون على المشتهات و على حسب المزاج

و الهديه الاكبر انها لما اكتشفت اني قبل الانتخابات احتار و افكر منو اعطيه صوتي
لانها امانة امام الله سبحانه و تعالى
قاعد تفكر انها يا تصوت بدالي او تلغي الانتخابات
و طبعا كله هذا راحه لي عشان ما احاتي منو اعطي صوتي
ولا احاسب نفسي و اخاف من ربي على هذه الامانه


يا زينكم يا حكومتنا
و قولوا امين
الله يجازيها باللي تسويه و نشوف نفس هالخير هذا كله فيهم لاننا نحبهم مثل ما يحبونا

اللهم احفظ الكويت واهلها من كل شر

الخميس، 2 ديسمبر 2010

كفو عليكم يا الابطال





الف الف الف مبروووك للمنتخب الوطني اداءة الرائع و فوزه العظيم على العراق

عيالنا بيضوها و لله الحمد يستاهلون و الله و ان شاء الله الكاس كويتي بأذن الله

كفو عليكم يا ابطال

و اليوم اللي زود فرحتنا هو فوز قطر بتنظيم كاس العالم 2022

بصراحه فرحتين لا اعرف من فيهم الاكبر

كفو و الله يا وحوش قطر

بالفعل فرحت بشكل لا يوصف

فالانجاز لاهلي واخواني الانجاز لشعبنا الخليجي الواحد

الف مبروك لاهلنا و اخواننا و حبايبنا في قطر على هذا الانجاز العظيم

و إلى الامام بأذن الله ....

و ان الله كتب لنا عمر في 2022 نكون من المشاركين و المتطوعين معهم بأذن الله