الجمعة، 10 ديسمبر 2010

هدية عيد ميلادي




يوم 6 ديسمبر كان ذكرى مولدي

و في ليلتها الكويت ولله الحمد حققت كاس الخليج العربي

و الفرحه عمت الكويت كلها

و من قدي الكويت كلها تحتفل بعيد ميلادي

و اعتبرت انها من اجمل هدايا عيد الميلاد و اكبرها

لكن اكتشفت اني غالي حيل عند حكومتنا المجيدة

و قررت الحكومة تهديني هدية اكبر
و هذا العشم فيها هاذي حكومة كلها خير و كرم و محبة للمواطن الكويتي
و ما يطلع منها الا كل خير و حب و سلام

الحكومة - جزاها الله بما عملت - حست اني انزعجت يوم الاربعاء فحبت تسوي لي شو show
قامت الله يخليها لعين ترجيها بلعب ( الاستغماء )
و الشرطه تلحق المواطنين و اللي يدخل بيت النائب الحربش هو الفايز
و اللي يمسكونه اول ينطق
طبعا غشمرة مو صج لان الحكومة تحبنا حييييييل
وان كان الشرطه بعد يا حليلهم مطيحين الميانه شوي
و استانسوا على اللعبة و تحمسوا و كسروا ايد كم واحد على كم ارتجاج في المخ
و هنيه طبعا الغلط مو على الشرطه ابداااا
المواطنين و النواب طلعوا مو مال غشمرة يزعلون بسرعه الله يهديهم
يعني واحد يلعب معاك شنو المشكله لما يغسل شراعك و يكسر ايدك خل روحك رياضيه
يا باشا لا تصير جاهل
- ولا اقولك صير جاهل احسن يمكن ما يصير فيك اللي صار و يمكن تنعز بعد -

يا حليلها الحكومة تونس ما شالله عليها
حتى يقولك الشرطه حبت اللعبه و حدهم استانسوا عليها
عشان جذيه بيكثرون لعب مع المواطنين
تعرفون الديرة صايرة زهقه و الحكومة ما تحب تخلي على المواطنين قاصر ابد
فلازم عليها انها تونسهم بهالالعاب و شويه علاج طبيعي بالتدليك العنيف في منتجعات وزارة الداخليه
و بنفس الوقت لازم تعلم هاللي يزعلون انه السالفه ما تستاهل
و خل جلدهم يتعلم على الطق عشان يطلعون رجال
و لا قدر الله لو صارت حرب و غزو الكويت لا قدر الله
يكون الشعب متعود على الطق و الاهانه من اللحين

ما شالله عليهم الحكومه ما خلت شي ابد
لازم تخطط لتنميه الانسان الكويتي
وتحسب حساب كل شي

بعد هذا كله احد يلومني لما احب الحكومه حبا جما لدرجه العشق و الهيام

حتى بتهديني كم هديه طيبة مثل الغاء كم مادة من الدستور و عدم العمل فيها
وتطبيق القانون على المشتهات و على حسب المزاج

و الهديه الاكبر انها لما اكتشفت اني قبل الانتخابات احتار و افكر منو اعطيه صوتي
لانها امانة امام الله سبحانه و تعالى
قاعد تفكر انها يا تصوت بدالي او تلغي الانتخابات
و طبعا كله هذا راحه لي عشان ما احاتي منو اعطي صوتي
ولا احاسب نفسي و اخاف من ربي على هذه الامانه


يا زينكم يا حكومتنا
و قولوا امين
الله يجازيها باللي تسويه و نشوف نفس هالخير هذا كله فيهم لاننا نحبهم مثل ما يحبونا

اللهم احفظ الكويت واهلها من كل شر

هناك 10 تعليقات:

  1. كأس الخليج العربي ؟
    تقصد كاس الخليج فقط !
    أو كأس - المرحوم- فهد الاحمد !

    كل عام وانت بخير في "يوم" مولدك !

    ردحذف
  2. وانت يصحه وسلامة

    بس شفيك علي ساخر لازم تغلطني

    بس يسلم راسك كاس ( دورة الخليج العربي لكرة القدم )

    هذا الاسم الاصح

    و اسم هذه الدورة ( دورة الشهيد فهد الاحمد )

    كلش ولا زعلك يا ساخر

    ردحذف
  3. يا شين الغشمرة

    و كل عام وانت بخير

    ردحذف
  4. كل عامـ وانت بألف خير فيلسوف ،،

    تخيل أمامك كيكة + شموع ( بدون العد علشان مانعرف عمرك)

    وانت الحين راح تطفيها شنو راح تتمنى ؟

    ملحوظة : ليست أمنية سياسية ولا وطنية نبي امنيتك الخاصة ( فيلسوفية) ؟

    شنو راح تتمنى ؟

    ردحذف
  5. ولو ..
    هات نبوس خشيمك .. :D

    ردحذف
  6. كل عام وانت بخير والكويت بخييير ومبروووك على الكأس
    يلا إن شاء الله الله يجعلها سنه حلوه مليئه بالسعاده
    وتصبح فيها فيلسوف زمانك
    تقبل مروري

    ردحذف
  7. Happy Belated Birthday :)

    ردحذف
  8. أزال المؤلف هذا التعليق.

    ردحذف
  9. انا السفااااااااااااااااااااااح

    ردحذف